काठमाडौं १७ पुस ।
गृह मन्त्रालयले बेरुजु फस्र्यौटमा सबैभन्दा बढी प्रतिशत हासिल गर्ने नेपाल प्रहरी र सशस्त्र प्रहरीका महानिरीक्षक (आईजीपी) द्वय सर्वेन्द्र खनाल र शैलेन्द्र खनाल पुरस्कृत गरेको छ।
आर्थिक वर्ष २०७४/०७५ नेपाल प्रहरीले ८८.५ प्रतिशत बेरुजु फस्र्यौट गरेको हो। त्यसैगरी सशस्त्रले ८६.९६ प्रतिशत बेरूजु फस्र्यौट गरेको मन्त्रालयले जनाएको छ। मन्त्रालयका अनुसार अध्यागमन विभागले ८४.६२ र गृह मन्त्रालयले ७४.४१ प्रतिशत बेरूजु फस्र्यौट गरेका छन्।
बेरुजु फस्र्यौटमा उल्लेखनीय भूमिका निर्वाह गरेको गृहमन्त्री रामबहादुर थापाले दुई आईजीपी र गृहसचिव प्रेमकुमार राईसहित ९ जनालाई पुरस्कृत गरेका हुन्।
मन्त्रालयका अनुसार अन्य पुरस्कृत हुनेमा गृहका सहसचिव महादेव पन्थ, अध्यागमन विभागका महानिर्देशक ईश्वरराज पौडेल, गृहका उपसचिव शिवनाथ पौडेल, लेखा अधिकृत मिठाराम सुवेदी, शालिकराम पराजुली र नरबहादुर कुँवर छन्। गृहमन्त्री बादलका प्रेस संयोजक किरण भट्टराईका अनुसार प्रहरीका आईजीपी खनालद्वयाई दस हजार रूपैयाँ पुरस्कार दिइएको छ भने अन्यलाई आठ हजार रुपैंया दिइएको छ।