काठमाडौ, असार ९ ।
संसदीय समितिले काठमाडौ–निजगढ द्रूततमार्ग निर्माणको काम तोकिएकै समयमा सम्पन्न गर्न नेपाली सेनालाई निर्देशन दिएको छ ।
संघीय संसदको विकास तथा प्रविधि समितिले आयोजनाको कामलाई सहज ढंगले अघि बढाउन प्रधानमन्त्री तथा मन्त्रिपरिषद् कार्यालयमा पेश गरेको विस्तृत परियोजना प्रतिवेदन (डीपीआर) तत्काल स्वीकृत गरेर नेपाली सेनालाई दिन सरकारलाई पनि सचेत गराएको छ ।
समितिको आजको बैठकमा आयोजनाका प्रमुख सरदलाल श्रेष्ठले डीपीआर मन्त्रिपरिषद बैठकबाट स्वीकृत नभएकाले आयोजनाको पुल र सुरुङ निमाणको कामलाई बढाउन समस्या भएको जानकारी गराउनु भएको थियो । आयोजनाको पछिल्लो कार्य प्रगति विवरणलाई हेरेपछि समयमै सम्पन्न गर्न नेपाली सेनालाई निर्देशन दिनु परेको समितिकी सभापति कल्याणी खड्काले जानकारी दिनुभयो ।
उहाँले मन्त्रिपरिषद् बैठकमा पेश गरेको आयोजनाको डीपीआर तत्काल स्विकृत गरी नेपाली सेनालाई दिन पनि समितिले सरकारलाई सचेत गराएको बताउनु भयो । बैठकमा समितिका सदस्यहरुले आयोजनाको लागत र समय दुवै बढ्ने भन्दै चिन्ता व्यक्त गरेका थिए ।
समितिका अर्का सदस्य जिपछिरिङ लामाले आयोजनाको काम आगामी ५ वर्ष भित्र पनि सेनाले सम्पन्न गर्न नसक्ने दाबी गर्नु भएको थियो । नेपाली सेनाले सुरुङ निर्माणका कारण आयोजनाको लागत बढ्न सक्ने पनि अनुमान गरेको छ ।
