काठमाडौं, १५ जेठ ।
१२ वैशाख ०७२ को भूकम्पपछि बन्द रहेको नेपाल–चीनको मुख्य नाका तातोपानी चार वर्षपछि आजदेखि औपचारीक रुपमा सन्चालनमा आउँदैछ । भूकम्प र २१ असार ०७३ को भोटेकोसी बाढीले क्षतिग्रस्त मितेरी पुल, लार्चा्स्थित सुक्खा बन्दरगाह र कोदारी सडक चीनले पुनर्निर्माण गरिदिएपछि नाका खुल्ने भएको हो ।
आज नेपालका तर्फबाट उद्योग वाणिज्य तथा आपूर्तिमन्त्री मातृकाप्रसाद यादव, चिनियाँ राजदूत होउ यान्छी र तिब्बत सरकारका प्रतिनिधिको उपस्थितिमा नाकाको औपचारिक उद्घाटन गर्ने कार्यक्रम छ ।
भूकम्पलगत्तै बन्द गरिएको नाका खासामा अड्किएका नेपाली व्यापारीका तीन सयभन्दा बढी कन्टेनर नेपाल पठाउन ०७२ साल साउन १५ मा एक साताका लागि नाका खुला गरिएको थियो ।
नाका सञ्चालनका लागि अध्यागमन, भन्सार र क्वारेन्टाइनका कर्मचारी पूर्ववत् काममा खटिसकेका छन् । तत्काल परीक्षणका रूपमा नाका सञ्चालन गरिने छ । नाका खुलेपछि सीमाक्षेत्रका बासिन्दा उत्साही भएका छन् ।
नाका सन्चालनमा आउने भएपछि नेपालका लागि चिनियाँ राजदूत हउ याङ्छीले निरीक्षण समेत गर्नुभएको छ ।
