काठमाडौ, १४ मंसिर ।
नेपाल शिक्षक महासंघले शुक्रबार प्रदर्शनीमार्गमा विरोध प्रदर्शन गरेको छ । सरकारले शिक्षक संगठनहरुसँग गरेका सम्झौताहरु कार्यान्वयन नगरेको भन्दै पूरा गर्न माग गर्दै विरोध प्रदर्शन गरेका हुन् ।
उक्त शिक्षक सभालाई सम्बोधन गर्दै अखिल नेपाल शिक्षक संगठनका अध्यक्ष घनश्याम पाठकले इन्टरनेश्नल पिस फेडेरेशनको कार्यक्रममा सहभागी भएका विदेशी पाहुनाहरुले शिक्षकको पीडा र समस्या देखुन् भनेर सरकारको रवैयाविरुद्ध जुलुस प्रदर्शन गरेको बताए ।
उनले सरकारले भन्ने गरेको समाजवाद नक्कली भएको भन्दै सक्कली समाजवाद ल्याउनुको विकल्प नरहेको बताए ।
‘समाजवादी भन्न रुचाउने यो सरकारको पालामा महिनाको ६ हजार तलव खाने शिक्षक र मासिक २ हजार तलब बुझ्ने विद्यालय कर्मचारी अहिले पनि छन्’ पाठकले भने ‘यसले पेटभरी खान पुग्दैन अनि कसरी समाजवादी हुन्छ ?’ प्रश्न गरे । अहिलेसम्म शिक्षकको माग पुरा नगरेकाले अब निर्णायक आन्दोलन गर्ने उद्घोष गरे ।
उक्त सभालाई शिक्षक महासङ्घका अध्यक्ष बाबुराम थापा, महिला उपाध्यक्ष टीका राई लगायतले सम्बोधन गर्दै शिक्षक संगठनहरुसँग विगतमा भएका सम्पूर्ण सहमति र सम्झौताहरु तत्काल पूरा गर्न माग गरे ।
