२४ भदौ, काठमाडौं ।
दोस्रोपटक गिरफ्तार गरी भक्तापुर जिल्लाको जगाती प्रहरी हिरासतमा थुनामा राखिएका नेपाल कम्युनिस्ट पार्टीका केन्द्रीय सदस्य टेकबहादुर के.सी. ‘आजाद’को रिहाईको माग गर्दै दर्ता भएको बन्दी प्रत्यक्षीकरण रिटलाई सर्वोच्चले खारेज गरेको छ ।
कृष्णबहादुर विश्वकर्माले दर्ता गरेको रिटमाथि आज सर्वोच्चको इजलास नं. ७ मा न्यायाधीश हरिकृष्ण कार्की र डा. आनन्दमोहन भट्टराईको संयुक्त इजलासमा भएको बहसपछि खारेज गर्ने आदेश दिएको हो ।
नेता केसीको हकमा भक्तपुर जिल्ला अदालतले धरौटीमा रिहा गर्न यसअघिनै आदेश दिइसकेको अवस्थामा अर्को आदेश दिइराख्नु नपर्ने ठहर गर्दै खारेजीको आदेश दिइएको हो ।
रिट निवेदकको तर्फबाट वरिष्ठ अधिवक्ता एकराज भण्डारी, अधिवक्ता कपिलचन्द्र पोखरेललगायतले बहस गरेका थिए ।
के.सी.लाई यसअघि भक्तपुर जिल्ला अदालतको आदेशमा रिहा भएलगत्तै भदौ ४ गते पुनः गिरफ्तार गरी थुनामा राख्दै आएको छ । गैरकानूनी रुपा थुनामा राखेको जनाउँदै मुक्त गर्न रिट निवेदकले माग गरेका थिए ।
