काठमाडौं, बैशाख २४ ।
प्रधानमन्त्री केपी शर्मा ओलीले बालशिक्षालाई सरकारले उच्च प्राथमिकता दिने बताउनु भएको छ ।
दक्षिण एसियाली बाल अधिकारकर्मीको आज काठमाडौंमा भएको सम्मेलनको उद्घाटन गर्दै प्रधानमन्त्री ओलीले ग्रामीण क्षेत्रका बालबालिका शिक्षाबाट बन्चित हुन नपरोस् भन्ने सरकारको नीति रहेको प्रष्ट पार्नुभएको छ ।
उहाले गुणस्तरीय शिक्षा बालबालिकाको नैसर्गिक अधिकार भएकाले शिक्षामा समानता सरकारको प्राथमिकता भएको बताउनु भयो ।
अझै पनि ग्रामीण क्षेत्रमा धेरै बालबालिका शिक्षाबाट बन्चित हुनु परेको तथ्यांक सरकारसँग रहेको भन्दै प्रधानमन्त्री ओलीले अब प्रत्येक बालबालिकाको प्रथम ढोका विद्यालय हुने बताउनु भएको छ । सबै तहका बालबालिकाले शिक्षा लिने वातावरण सिर्जना गर्न सरकारले निःशुल्क शिक्षामा जोड दिएको प्रधानमन्त्रीको भनाई थियो ।
उहाले दक्षिण एसियाका बालबालिकाको शैक्षिक अधिकार सुरक्षित गर्न सार्क क्षेत्रका बालअधिकारकर्मी एक हुनुपर्नेमा जोड दिनुभएको छ ।
कार्यक्रममा शिक्षा, विज्ञान तथा प्रविधि मन्त्री गिरिराजमणी पोखरेलले शिक्षा क्षेत्रमा भएको मनपरीतन्त्रको अन्त्य गरिने बताउनु भयो । उहाले बाल शिक्षालाई प्रभावकारी बनाउन शिक्षालाई ग्रामीणमुखी बनाइने प्रतिबद्धता व्यक्त गर्नुभएको छ
सार्क राष्ट्रका बालअधिकारकर्मीको सामुहिक प्रयास बालबालिकाको हितको लागि हुनुपर्ने उहाको भनाई थियो । तीन दिने सम्मेलनमा सार्क क्षेत्रका बालअधिकारकर्मी सहभागी छन् ।
