बाँके, वैशाख ११ ।
मावि तहसम्मको शिक्षा सम्पूर्ण रुपमा निशुल्क गर्नुपर्ने लगायतका माग राखि आन्दोलनमा उत्रिएका बिद्यार्थी संगठनहरुले आज बाँकेको कोहलपुर नगरपालिकाको शिक्षा समितिको कार्यालयमा तालाबन्दी गरेर नगर शिक्षा अधिकारीलाई कार्यालयभित्रै थुनेका छन् ।
स्वतन्त्र विद्यार्थी युनियन, अनेरास्ववियु, नेपाल विद्यार्थी संघ, राष्ट्रवादी विद्यार्थी संघ र नयाँ शक्ति विद्यार्थी संघले नगर शिक्षा अधिकारी मनप्रसाद रेग्मी, श्रोत व्यक्ति जयप्रकाश शाह र कर्मचारी हेमराज रावतलाई कार्यालयभित्रै थुनेर तालाबन्दी गरेका हुन् ।
यसअघि ५ दिने अल्टिमेटम दिइएको तर नगरपालिकाले माग पूरा गराउनतर्फ चासो नदिएका कारण तालाबन्दी गरिएको स्ववियुका दिनेश केसीले जानकारी दिए ।
मावि तहसम्मको शिक्षा सम्पूर्ण रुपमा निशुल्क गर्नुपर्ने, निजी विद्यालयले लिइरहेको चर्को शुल्क, घटाउने , पुस्तक सिण्डीकेटको अन्त्य हुनुपर्ने, अनुमती बिनाका विद्यालय खारेज गर्नुपर्ने लगायतका मागसहित विद्यार्थीहरु आन्दोलनमा उत्रिएका हुन् ।
नगर शिक्षा अधिकारी रेग्मीले विद्यार्थीका माग पूरा गराउन नगर शिक्षा समितिको बैठक बस्ने तयारी भइरहदा आफूहरुलाई कोठाभित्र थुनेर तालाबन्दी गरिएको बताउनुभयो ।
