काठमाडौं, वैशाख १० ।
शिक्षा, विज्ञान तथा प्रविधिमन्त्री गिरिराजमणि पोखरेलले पाँच महिनाभित्र अनिवार्य शिक्षा ऐन ल्याउने प्रतिवद्धता जनाउनु भएको छ ।
राजधानीको सिनामंगलस्थित गुहृयेश्वरी माध्यामिक विद्यालयले आज आयोजना गरेको बृहत शैक्षिक जागरण अभियानलाई सम्बोधन गर्दै उहाँले ऐनमा आफ्ना छोराछोरीहरुलाई विद्यालय नपठाउनेहरु माथि कार्वाही हुने व्यवस्था राखिने बताउनु भएको हो ।
मन्त्री पोखरेलले बालबालिकाहरुलाई विद्यालय पठाए, नपठाएको अनुगमन गर्ने कामको जिम्मेवारी स्थानीय तहलाई दिने गरी संसदमा छलफल गर्ने योजना रहेको उल्लेख गर्नु भयो ।
सरकारले यस वर्ष बाहिर रहेका सबै बालबालिकाहरुलाई विद्यालयमा ल्याउने योजनाका साथ विद्यालय भर्ना अभियान शुरु गरेको छ । मन्त्री पोखरेलले विद्यालय भर्ना गराउने सरकारको अभियानमा साथ दिन पनि सबैमा आग्रह गर्नू भयो ।
स्वेच्छिक अभिभावकत्व ग्रहण गर्दै थप एक जना विद्यार्थीलाई पनि विद्यालय भर्ना गरि सहयोग गर्न उहाँको आग्रह थियो । यस वर्ष विद्यालय भर्नामा सहयोग गरे ती सबै विद्यार्थीहरुको जिम्मा आगामी वर्षबाट सरकार आफैले लिने उहाँले बताउनु भयो ।
