काठमाडौँ बैशाख ५ ।
सरकारले नयाँ शैक्षिक सत्र सुरु भएसंगै विद्यार्थी भर्ना अभियानलाई तीब्र पारेको छ ।
दुई वर्ष्भित्र निरक्षरता उन्मूलन गर्ने अभियान अन्तर्गत प्रधानमन्त्री, मन्त्री, विभिन्न दलका नेताहरु विद्यार्थी भर्ना अभियानमा सहभागी भएका छन् । सोहि क्रममा आज प्रधानमन्त्री केपी शर्मा ओलीले सिरहाका दुई जना बालबालिकालाई विद्यालय भर्ना गराएर अभिभावकत्व ग्रहण गर्नु भएको छ ।
सिरहाको रामदुलारी मावि कल्याणपुर नगरपालिका ११ का दिनेश कुमार र कौशिला देवी मण्डल खत्वेकी ५ वर्षीय छोरी रुपाकुमारी मण्डल खत्वे, भोगेन्द्र र अमिराकुमारी मल्लिकका ५ वर्षीय छोरा पवन मल्लिक डोमलाई प्रधानमन्त्रीले विद्यालय भर्ना गराउनुभएको हो ।
भर्ना गरिएका बालबालिकालाई प्रधानमन्त्रीले पुस्तक र पोशाक समेत वितरण गर्नुभएको थियो ।
विद्यालय भर्ना गरेपछि सम्बोधन गर्दै प्रधानमन्त्रीले आफूले भर्ना गराएका विद्यार्थी सफल भएको हेर्न चाहेको बताउनुभयो ।
उहाँले भर्ना अभियानमा विद्यालय गएका विद्यार्थीलाई विद्यालयमै टिकाउन सरकारले सबै सहयोग गर्ने प्रतिबद्धता पनि जनाउनुभयो ।
यसअघि बैशाख १ गते मुगुमा प्रधानमन्त्री ओलीले एक बालिकालाई विद्यालय भर्ना गराउनुभएको थियो ।
यसैबिच माओवादी केन्द्रका अध्यक्ष पुष्पकमल दाहालले पनि चितवनमा दुई जना मुसहर बालकको अभिभावकत्व लिएर विद्यालय भर्ना गराउनुभएको छ ।
चितवन क्षेत्र नं ३ का सांसद दाहालले आफ्नो निर्वाचन क्षेत्रको भरतपुर महानगरपालिका २८ मेघौलीको साझापुर माविमा अरूण मुसहर र पत्रुस मुसहरलाई भर्ना गराउनुभएको हो ।
यस्तै एमाले महासचिव एवं रक्षामन्त्री इश्वर पोखरेलले काठमाडौंको धुम्बाराहीस्थित कसन पल्टन सेकेन्डरी स्कुलमा काभ्रेकी संजिता चौलागाईलाई कक्षा १ मा भर्ना गर्नु भएको छ ।
अर्थमन्त्री युवराज खतिवडाले धुम्बाराहीस्थित चण्डिका प्राथमिक विद्यालयमा स्याङजाकी अस्मिता धमेललाई कक्षा ४ मा भर्ना गर्नु भएको छ ।
सरकारले विद्यार्थी भर्ना अभियान अन्तर्गत एक जनाको अभिभावकत्व ग्रहण गर्दै भर्ना गराउने अभियान नै शुरु गरेको छ ।
शिक्षा विभागका अनुसार आधारभूत तहमा सबैभन्दा बढी सर्लाही, धनुषा, रौतहट, पर्सा, बारा, कपिलवस्तु, मोरङ, सुनसरी, रूपन्देही, सप्तरी, सिरहा, महोत्तरी र बाँकेमा बालबालिका विद्यालय भन्दा बाहिर छन् ।
