काठमाडौं आश्विन २५, ।
विश्व क्रिकेट लिग च्याम्पियनसिपमा हङकङविरुद्ध हुने खेलमा नेपालसँग जित बाहेक अर्को विकल्प नरहेको कप्तान पारस खड्काले बताएका छन् ।
विश्व क्रिकेट लिग च्याम्पियनसिपमा नेपाल र हङकङबीच पर्सि शुक्रबार र आइतबार प्रतिस्पर्धा हुँदैछ ।
सोहि ५० ओभरको दुई खेल खेल्न नेपाली टोली आज बिहान हङकङ पुगेको हो । हङ्कङ बिमानस्थलमा कप्तान खड्काले भने, च्याम्पियनसिपमा नेपाली टोलीका लागि जित बाहेक अर्को विकल्प नभएके बताए ।
अहिलेको टिममा नयाँ तर अनुभवी खेलाडी रहेको उनलेबताए । १२ वर्षपछि नेपाली राष्ट्रिय टोलीले हङकङमा आधिकारिक खेल खेल्न लागेको हो ।
२००५ मा परेश लोहनीको कप्तानीमा नेपालले एसीसी फास्ट ट्रयाक कन्ट्रिज तीनदिवसीयमा प्रतिस्पर्धा गरेको थियो । सो टोलीका रहेका पारस अहिले राष्ट्रिय टिमका कप्तान छन् भने शरद भरपर्दा अलराउण्डर हुन् ।
हङकङ भ्रमणका अर्का अनुभवी खेलाडी शक्ति गौचन अस्वस्थताका कारण यस पटक नेपाली टोलीमा छैनन् ।
गत वर्ष सन्दीप लामिछानेले हङकङ ब्लिजमा काउलुनबाट खेलेका थिए । कप्तान पारसले शक्तिको अनुपस्थिति नेपाली टोलीका लागि ठूलो घाटा भए पनि दुई स्पिनर सुशन भारी र सुशील कँडेलका लागि भने अवसर भएको बताए ।
वसन्त रेग्मी र सन्दीप भएका कारण सुशन र सुशीलले प्लेयिङमै खेल्न पाउने सम्भावना निकै कम छ ।
च्याम्पियनसिपको अंक तालिकामा हङकङ ११ अंकसहित पाँचौं र नेपाल ८ अंकसहित छैटौं स्थानमा छ । च्याम्पियनसिपको शीर्ष चार टोली २०१९ को विश्वकप छनोटमा पुग्ने छ । नेपालले सातौं तथा अन्तिम चरणमा आगामी डिसेम्बरमा युएईसँग उसैको गृहमैदानमा खेल्ने छ ।
