काठमाडौं आश्विन २३, ।
ए डिभिजन क्लब रुस्लान थ्रिस्टारलाई क्षतिपूर्ति बापत डेढ करोड रुपैयाँ दिने प्रस्ताव अखिल नेपाल फुटवल संघ एन्फाको विशेष साधारणसभाले पारित गरेको छ ।
ललितपुरको एउटा होटलमा जारी विशेष साधारणसभाले यस्तो निर्णय गरेको हो । एशियाली फुटवल महासंघ एएफसीको निर्देशन अनुसार बिधान संशोधन र नयाँ नेतृत्व चयनका लागि अधिवेशनको मिति तय गर्न बसेको विशेष साधारणसभा अधिकांशले थ्रिस्टारलाई क्षतिपूर्ति दिनुपर्ने धारणा राखेपछि निर्णय गरिएको केन्द्रीय सदस्य एवंम् फुटसल समिति संयोजक रमेश रायमाझीले जानकारी दिनुभयो ।
त्यस्तै विशेष साधारणसभाले साफ अण्डर १८ फुटबल प्रतियोगिता विजेता युवा टोलीका सदस्यलाई जनही २ लाख रुपैयाँ प्रदान गर्ने निर्णय समेत गरेको छ । भुटानको थिम्पुमा सम्पन्न प्रतियोगितामा नेपालले अन्तिम खेलमा भारतलाई पराजित गर्दै उपाधि चुमेको थियो । त्यस्तै विधान संशोधन सम्बन्धी प्रस्तावमा जिल्ला र क्लवको प्रतिनिधिको संख्या झारेर २ र्पुयाउने प्रस्ताव अस्विकृत भएको छ । साधारणसभामा क्लव र जिल्लाबाट पुरानै व्यवस्था अनुसार ३–३ जनाको सहभागिता रहने केन्द्रीय सदस्य प्रकाश पंगेनीले जानकारी दिनुभयो । त्यस्तै १ जना प्रस्तावक र अर्का एक समर्थकलाई लिएर उम्मेदवार बन्न पाउने व्यवस्था गर्ने गरी विधानमा संशोधन गरिएको छ । यसअघि अध्यक्षका लागि ५ जना समर्थक र ५ जना प्रस्तावक आवश्यक पर्ने व्यवस्था थियो । विशेष साधारणसभाले यसअघि हटाइएको महिला समितिलाई ब्युँत्याउने निर्णय पनि गरेको छ ।
