काठमाडौं, असोज ४ ।
प्रदेश नम्बर २ का आठ जिल्लामा भएको स्थानीय तह निर्वाचनको अहिले राजविराज नगरपालिकाबाहेक १३३ वटा स्थानीय तहमा २९८ टोलीबाट मतगणना भइरहेको छ ।
प्रारम्भिक मत गणनामा ६ वटा दलबीच तिब्र प्रतिस्पर्धा देखिएको छ । नेपाली कांग्रेस, नेकपा एमाले, नेकपा माओवादी केन्द्र, राष्ट्रिय जनता पार्टी, संघीय समाजवादी फोरम र नेपाल लोकतान्त्रिक फोरमका उम्मेदवारबीच प्रतिस्पर्धा देखिएको हो ।
मतगणना भइरहेका स्थानीय तहमध्ये प्राप्त पछिल्लो विबरण अनुसार मतगणनामा सत्ता नेतृत्वकर्ता दल नेपाली कांग्रेसले फराकिलो अग्रता कायमै राखेको छ । तर, २ नम्बर प्रदेशका एक महानगर र तीन उपमहानगरमा भने कांग्रेस पछि परेको छ ।
पछिल्लो मतगणनामा कांग्रेस २८ स्थानमा अगाडी छन भने एमाले १८ स्थानमा अगाडी छ । संघीय समाजवादी फोरम १५, माओवादी केन्द्र १४ स्थानमा र राजपा १० स्थानमा अगाडी छ । नेपाल लोकतान्त्रिक फोरम २ स्थानमा अगाडी छ ।
अघिल्ला दुई चरणकोजस्तै तेस्रो चरणमा तराई मधेसमा भएको निर्वाचनको मतगणना पनि अत्यत्नै सुस्त गतिमा भइरहेको छ । यही हिसावले मतगणना भए मतपरिणाम आउन साता दिनसम्म लाग्ने अनुमान गरिएको छ ।
प्रारम्भीक मतगणनामा कांग्रेस ठूला नगरमा भने पछि परेको छ । वीरगन्ज महानगरपालिकामा र जनकपुर उपमहानगरपालिकामा राजपा अगाडि छ भने जितपुर सिमरा र कलैया उपमहानगरपालिकामा एमाले अगाडि छ । रौतहटको गौर, सिरहाको लहान नगरपालिकामा एमाले अगाडि छ ।
राजमार्गका स्थानीय तहमा एमालेलाई कांग्रेस र माओवादी केन्द्रले बराबरी टक्कर दिएका छन् । राजमार्ग क्षेत्रबाट बढी आशा गरेको एमालेका लागि दुई दलको सामना गर्नुपर्ने भएपछि परिणाम आफ्नोतिर पार्न सकस पार्न निश्चित छ ।
यसैबीच, रौतहटको गरुडा नगरपालिका–३ को वडाध्यक्ष पदमा नेपाली काँग्रेस र नेकपा (माओवादी केन्द्र)का उम्मेदवारबीच एक मत फरकको परिणाम आएपछि माओवादी केन्द्रका उम्मेदवारले पुनः मतगणनाका लागि निवेदन दर्ता गराएका छन् ।
सो विषयमा राजनीतिक सहमति कायम भएलगत्तै उक्त स्थानीय तहमा मतगणना पुनः शुरु हुने बताइएको छ ।
त्यस्तै, बारा जिल्लाका बारागढी गाउँपालिकामा माओवादी केन्द्रका प्रतिनिधि उपस्थित नभई मतपेटिका खोलिएको भन्ने विषयमा सामान्य विवाद उठेपछि रोकिएको मतगणना राजनीतिक सहमति जुटाएर मतगणना शुरु गर्ने प्रयास भइरहेको सूचना प्राप्त भएको छ ।
राजविराज नगरपालिकाको वडा नं १५ का राष्ट्रिय जनता पार्टीका वडाध्यक्षका उम्मेदवारको निधन भएकाले उक्त वडामा असोज ५ गते मतदान भएपछि मात्रै मतगणना कार्य शुरु हुने बताइएको छ ।
