काठमाडौं, भदौ २२।
आगामी असोज २ गते हुने प्रदेश नम्बर २ को तेस्रो चरणको स्थानीय तह निर्वाचनका लागि हिजो दर्ता भएका उम्मेदवार माथि आज उजुरी दिन सकिने छ । त्यसका लागि आज विहान १० बजे देखि दिउसो १ बजे सम्मको समय निर्धारण गरिएको छ ।
दावी विरोधपछि आजै दिउँसो १ बजेदेखि राती साढे ११ बजे मनोनयन पत्र जाँच हुने आयोगले जनाएको छ । भोली बिहान साढे ११ बजेदेिख १ बजेसम्म उमेद्बारको नाम प्रकाशन गर्ने र साँझ ५ बजेसम्म उम्मेद्वारी फिर्ताको लागि समय छुट्याएको आयोगले जनाएको छ ।
आगामी शनिबार १० देखि ११ बजेसम्ममा उम्मेद्वारको अन्तिम नामावली प्रकाशन गर्नेछ भने सोही दिन नै उम्मेदवारलाई निर्वाचन चिन्ह प्रदान गरिनेछ । यस अघि हिजो प्रदेश नं २ को आठ जिल्लामा शान्तिपूर्ण रुपमा उम्मेदवारी दर्ता भएको आयोगले जनाएको छ ।
तेस्रंो चरणमा प्रदेश नम्बर २ का १ महानगरपालिका, ३ उपमहानगरपालिका ७३ नगरपालिका र ५९ गाउँपालिकामा नयाँ नेतृत्व चयनका लागि आगामी असोज २ गते निर्वाचन हुँदै छ ।
देशभरका ७ सय ५३ स्थानीय तहमध्ये प्रदेश २ का आठ जिल्लाभित्रका १ सय ३६ स्थानीय तहमा मात्र निर्वाचन हुन बाँकी छ । बाँकी रहेको १ सय ३६ स्थानीय तहबाट ६ हजार ६ सय २७ जना जनप्रतिनिधि निर्वा्चित हुने छन् ।
तेस्रो चरणको स्थानीय तह निर्वाचनमा ३१ हजार ५ सय कर्मचारी परिचालन हुने निर्वाचन आयोगले जनाएको छ ।
तेस्रो चरणको निर्वाचनमा २६ लाख ६४ हजार ९ सय ५० मतदाता सहभागी हुँदै छन् ।
त्यसका लागि २ हजार १ सय ६६ मतदान स्थल र ३ हजार ५ सय ७८ वटा मतदान केन्द्र तोकिएको निर्वाचन आयोगले जनाएको छ ।
