काठमाडौ १८ भदौ ।
नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाले पदको दुरुपयोग गरी काठमाडौ नेशनल मेडिकल कलेजको सम्बन्धन स्थगन गरेको आरोप लगाउनु भएको छ ।
विराटनगर विमानस्थलमा आयोजित पत्रकार सम्मेलनमा बोल्दै उहाँले विश्वविद्यालयको पदीय हैसियतको दुरुपयोग गरी प्रधानमन्त्री देउवाले स्वइच्छाचारी ढङ्गले नेशनल मेडिकल कलेजको सम्बन्धन स्थगित गरेको आरोप लगाउनु भयो ।
प्रधानमन्त्रीले आफ्नो कुलपतिको पदको दुरुपयोग गर्दै स्वइच्छाचारी निर्णय गरेको भन्दै ओलीले अब कुनै पनि निकाय वा संस्था दवाव भन्दा बाहिर रहेको काम गर्ने वातावरण नरहेको टिप्पणी गर्नुभयो ।
अर्को फरक प्रसंगमा उहाँले संसदमा चुनिएका प्रधानमन्त्रीले छिमेकी मुलुकमा गएर सांसदको निर्णय फेरी सच्याउछु भन्नु हास्यास्पद भएको टिप्पणी गर्नुभएको छ ।
संसदको दुई तिहाईले गरेको निर्णयलाई भारतमा गएर सच्याउछु भन्नु लज्जास्पद भएको उहाँको भनाई छ । पूर्वप्रधानमन्त्री समेत रहनु भएका ओलीले २ महिनापछि एमाले सरकारमा जाने दावी समेत गर्नुभयो ।
