काठमाण्डौ , १७ भदौ ।
नेकपा माओवादी केन्द्रको केन्द्रिय सचिवालयको बैठक आज बस्दै छ ।
बीरगन्जमा बिहान ११ बजेपछि बस्ने बैठकमा २ नम्बर प्रदेशमा चुनावी रणनितिका साथै प्रदेश र प्रतिनिधि सभा निर्वाचनका लागि संगठनात्मक संरचना निर्माण सम्बन्धी बिषयमा छलफल हुने छ ।
पार्टीलाई दुई नम्बर प्रदेशको निर्वाचनमा केन्द्रित गरेर शिर्ष नेताहरुनै चुनावी प्रचारप्रसारमा तराईमा रहेकाले पार्टीको उच्चस्तरीय समितिको बैठक पनि वीरगन्जमा बोलाईएको माओवादी केन्द्रले जनाएको छ ।
माओवादी केन्द्रले पहिलो पटक केन्द्रिय सचिवालय बैठक वीरगन्जमा आह्वान गरेको हो ।
पार्टी प्रवत्ता पम्फा भुषलका अनुसार आजको बैठकमा २ नम्बर प्रदेशमा चुनावी रणनितीका साथै उम्मेदवार चयन , प्रदेश र प्रतिनिधी सभा निर्वाचनको तयारीका बिषयमा छलफल हुनेछ ।
बैठकमा अध्यक्ष पुष्पकमल दाहाल सहित शिर्ष नेता र सचिवालयका सबै नेता आजको बैठकमा सहभागी हुने उहाँले बताउनु भयो ।
अध्यक्ष दाहाल एक सातादेखि प्रदेश नम्बर २ अन्तरगतका आठ जिल्लामा चुनावी अभियानमा हुनुहुन्छ ।
