काठमाडौ १६ भदौ ।
व्यवस्थापिका संसदको राज्य व्यवस्था समितिको बैठक आज बस्दैछ । सिंहदरबारस्थित समितिको कार्यलयमा बिहान ११ बजेपछि बस्ने बैठकमा प्रदेश सभा र प्रतिनिध सभा निर्वाचन विधेयकका सम्बन्धमा छलफल हुनेछ ।
बैठकमा आयोगका पदाधिकारीलाई समेत बोलाइएको समितिले जनाएको छ । निर्वाचन मस्यौदालाई अन्तिम रुप दिने प्रयासमा लागेको समितिले आज आयोग पदाधिकारीसँग सुझाव लिन लागेको हो ।
प्रदेश र प्रतिनिधि सभा निर्वाचन दुई चरणमा गर्ने गरी निर्वाचन आयोगले तयारी अघि बढाएपनि निर्वाचन सम्
बन्धी विधेयक भने तयार भइसकेको छैन ।
प्रमुख निर्वाचन आयुक्त आयोधिप्रसाद यादवले कानुन निर्माण कार्य संसदको अधिकार भएपनि आयोगले निर्वाचनलाई सजिलो बनाउने गरी कानुन बनाउन सुझाव दिने बताउनु भयो ।
संघ र प्रदेश सभा निर्वाचनका लागि आवश्यक अन्य कानुन निर्माणका विषयमा पनि आजको बैठकमा छलफल हुने जनाइएको छ । यस्तै आजै आसन्न संघ र प्रदेश सभा निर्वाचनको कार्यक्रम सार्वजनिक गर्ने आयोगले तयारी गरेको छ ।
आयोग पदाधिकारीको दिउँसो बस्ने बैठकपछि निर्वाचन कार्यक्रम सार्वजनिक गर्ने निर्वाचन आयोगका प्रवत्ता नवराज ढकालले जानकारी दिनुभयो । आयोगले संघ र प्रदेशको निर्वाचन आगामी मंसिर १० र २१ मा गर्ने गरी तयारी अघि बढाएको छ ।
