काठमाडौ ,१५ भदौ ।
राप्रपाबाट अलग्गीएर बनेको राप्रपा प्रजातान्त्रिक सरकारमा सहभागी हुने भएको छ । शेरबहादुर देउवा नेतृत्वको सत्ता गठबन्धनलाई समर्थन गरेको राप्रपा प्रजातन्त्रिक चार मन्त्री र दुई राज्यमन्त्रीसहित सरकारमा सहभागी हुन लागेको हो ।
राप्रपा प्रजातान्त्रिक सहभागी भएपछि बर्तमान देउवा नेतृत्वको सरकार नेपालको राजनीतिक इतिहासमै सवैभन्दा ठूलो मन्त्रीमण्डल बन्नेछ । प्रजातान्त्रिकले पार्टीका तर्फबाट सुनिलकुमार थापा, दिपक बोहोरा, बिक्रम पाण्डे र रामकुमार सुब्बालाई मन्त्री बनाउने निर्णय गरेको छ ।
राजयमन्त्री बन्नेहरुको नाम भने टुङ्गो लाग्न बाँकी छ । राप्रपा प्रजातान्त्रिकलाई वन, उद्योग, शान्ति तथा पुनर्निर्माण र महिला बालवालिका तथा समाज कल्याण मन्त्रालय दिने सरकारको तयारी छ ।
यद्यपी उसले आफ्नो भागमा परेको मन्त्रालय हेरफेर गर्ने सम्बन्धमा सत्ता साझेदार दल माओवादी केन्द्रका अध्यक्ष पुष्पकमल दाहालसँग छलफल गर्ने भएको छ ।
चुनावी प्रचार प्रसारका क्रममा दुई नम्बर प्रदेशमा रहेका दाहाल भोली दिउँसो काठमाडौं फर्कने कार्यक्रम रहेकाले भोली साँझसम्ममा राप्रपा प्रजातान्त्रिक सरकारमा सहभागी हुने एक नेताले जानकारी दिए ।
सरकारमा सहभागी हुने नहुने बिषयमा मतभेद भएपछि कमल थापा नेतृत्वको राप्रपाबाट अलग भएको राप्रपा प्रजातान्त्रिकले हालैमात्र निर्वाचन आयोगबाट दलको मान्यता पाएको हो । राप्रपा प्रजातान्त्रिकले आफुसँग १८ सांसद रहेको दावी गर्दै आएको छ ।
