काठमाडौ भदौ १४।
निर्वाचन क्षेत्र निर्धारण आयोगले सरकारलाई आज आफ्नो प्रतिवेदन बुझाउदै छ । आयोगले संघिय निर्वाचनका १ सय ६५ र प्रादेशिक निर्वाचनका लागि ३ सय ३० निर्वाचन क्षेत्र निर्धारण गरेको हो ।
सर्वाच्च अदालतका पूर्वन्यायधिश कमल नारायण दासको संयोजकत्वमा गठित आयोगले सोही प्रतिवेदन आज प्रधानमन्त्री शेरबहादुर देउवालाई बुझाउन लागेको हो ।
उक्त प्रतिवेदन आजै बुझाउने भनिए पनि बुझाउने समय भने तय भएको छैन । संघीय संरचना अनुसार नयाँ निर्वाचन क्षेत्र निर्धारणका लागि सरकारले गत साउन ५ गते दासको नेतृत्वमा आयोग गठन गरेको थियो ।
गठित आयोगले निर्वाचन क्षेत्र निर्धारणको कार्य भने गत साउन ११ गते देखि सुरु गरेको थियो । आयोगले जनसंख्या र भूगोललाई आधार मानी निर्वाचन क्षेत्र निर्धारण गरेको हो ।
सरकारले आगामी मंसीर १० गते प्रदेश र प्रतिनिधि सभाको निर्वाचन गर्ने मिति तय गरे पनि आयोगको प्रतिवेदन प्राप्त नहुदा निर्वाचन आयोगले काम गर्न समस्या भइरहेको बताइरहेको छ ।
