काठमाडौं ,१२ भदौ ।
नेपाली टिमका मुख्य प्रशिक्षक जगदिश भट्टले बंगलादेशविरुद्व हुने मैत्रीपूर्ण खेलले नेपाली राष्ट्रिय पूरुष भलिवल टिमको स्तर वृद्धिमा सहयोग पुग्ने बताएका छन् ।
बंगलादेशको राष्ट्रिय पूरुष भलिवल टिमसँग नेपालले दूई वटा मैत्रीपूर्ण म्याच खेल्दैछ । पहिलो खेल भोली ललितपुरको लगनखेलस्थित आर्मीको ट्रेनिङ सेन्टरमा हुनेछ ।
खेलअघि आयोजित पत्रकार सम्मेलनमा नेपाली टिमका मुख्य प्रशिक्षक भट्टले दुवै टोलीको स्तर समान भएकाले सकारात्मक नतिजा निकाल्न प्रयास गरिने बताए ।
नेपाली टिमले उल्लेख्य सुधार गरेको भन्दै उनले विदेशी प्रशिक्षकको सहयोगमा टिमको प्रदर्शन राम्रो हुने दाबी गरे । नेपाली टिमलाई नेदरल्यान्ड्सका प्रशिक्षकले तीन हप्ताको प्रशिक्षण गराएका थिए ।
त्यस्तै नेपाली टोलीका कप्तान इम रानाले मैत्रीपूर्ण खेल भएपनि जितका लागि खेल्ने बताए । बंगलादेश र नेपालको स्तर समान भएकाले जित हासिल गर्न कठिन नहुने उनको भनाई थियो ।
बंगलादेशी टिमका इरानी प्रशिक्षक अली पोअर एरोजीले नेपालसँग खेल्न पाउनुलाई सुखद अनुभवको रुपमा लिएको बताएका छन् ।
बंगलादेश भलिवल संघको अनुरोधमा नेपाल भलिवल संघले मैत्रीपूर्ण खेलको आयोजना गरेको संघका अध्यक्ष मनोरञ्जन रमण शर्माले जानकारी दिनुभयो ।
