काठमाडौं, भदौ ११ ।
इङ्लिस प्रिमियर लिग फुटबल अन्तर्गत आज राति चार खेल हुदै छन् । आज हुने पहिलो खेलमा चेल्सी र एभर्टन भिडदा दोस्रो खेलमा लिभरपुल र आर्सनल विच प्रतिस्पर्धा हुने छ ।
आजै हुने तेस्रो खेलमा टोटनह्यामले बर्न्लेको सामना गर्नेछ भने चौथो खेलमा वेष्ट ब्रोम र स्टोक सिटी विच प्रतिस्पर्धा हुने छ ।
यसअघि गएराती भएका खेलमा म्यान्चेस्टर युनाईटेड र म्यान्चेस्टर सिटी विजयी भएका छन् । आफ्नै मैदानमा भएको खेलमा जोजे मौरिन्होको म्यान्चेस्टर युनाईटेडले लेस्टर सिटीलाई २–० ले पराजित गरेको हो ।
खेलमा म्यानचेस्टर यनाईटेडलाई विजयी गराउन मार्कस रास्फोर्ड र मराउने फेलियानीले एक एक गोल गरे । यसअघि रोमेलु लुकाकुले पाएको एउटा पेनाल्टी अवसर खेर फालेका थिए । प्रिमियर लिगकै अर्को खेलमा म्यान्चेस्टर सिटीले बर्नमाउथलाई २–१ ले हराएको छ ।
खेलमा म्यान्चेस्टर सिटीलाई विजयी गराउन राहिम स्टर्लिङले अतिरिक्त समयमा निर्णायक गोल गरेका हुन् । यसअघि बर्नमाउथका चार्ली ड्यानियल्सले पहिलो गोल गरेका थिए भने सिटीका ग्याब्रिएल जिससले बराबरी गोल गरेका थिए ।
प्रिमियर लिग फुटबलकै अन्य खेलहरुमा स्वान्सी सिटीले क्रिस्टल प्यालेसलाई २–० ले तथा न्यूकासल युनाईटेडले वेष्ट ह्याम युनाईटेडलाई ३÷० ले हराएका छन् । हडर्स्फिल्ड टाउन र साउथह्याम्पटन तथा वाट्फोर्ड र ब्राईटनले भने गोलरहित बराबरी खेलेका छन् ।
