काठमाडौ १ भदौ ।
आगामी असोज दुई गते प्रदेश नम्बर २ मा हुने स्थानीय तह निर्वाचनका लागि आजदेखि निर्वाचन आचारसंहिता लागु भएको छ । प्रदेश नम्बर २ का ८ जिल्लामा आजदेखि आचारसंहिता लागु हुने आयोगले जनाएको छ ।
स्वच्छ, निष्पक्ष, पारदर्शी तथा भयमुक्त रुपमा निर्वाचन सम्पन्न गर्न निर्वाचन ऐन २०७३ को दफा २२ ले दिएको अधिकार प्रयोग गर्दै निर्वाचन आचारसंहिता २०७२ र स्थानीय तह निर्वाचन आचार संहिता २०७३ अनुसार निर्वाचन आचारसंहिता लागु गरेको आयोगले बताएको छ ।
आयोगका अनुसार मन्त्री, स्थानीय तह, सुरक्षा निकाय, राष्ट्रिय अनुसन्धान विभागका कर्मचारी, सार्वजनिक संस्थानका कर्मचारी, निर्वाचनको काममा संलग्न कर्मचारी, राजनीतिक दल तथा भातृ संगठन, सन्चार माध्यम र सार्वजनिक पद धारण गरेका व्यक्तिलाई आचारसंहिता लागु हुनेछ ।
सम्बन्धित व्यक्ति वा निकायले निर्वाचनलाई असर पर्ने खालका गतिविधि गरे कारबाही हुनेछ । उम्मेदवारलाई भने मनोनयन दर्ता भएको दिन भदौ २१ गतेदेखि आचार संहिता लागु हुने आयोगले जनाएको छ ।
