काठमाडौँ, १ भदौ ।
पार्टी विभाजनको ११ दिनपछि राष्ट्रिय प्रजातन्त्र पार्टीको केन्द्रीय कार्यसमितिको आज हेटौडामा बस्दैछ । बैठकमा पार्टी विभाजनपछिको अवस्था तथा भावी रणनितिका विषयमा छलफल हुने जनाइएको छ ।
पार्टी विभाजन तथा सरकारलाई दिएको समर्थन फिर्तापछि भावी राजनीतिक कार्यक्रमका लागि आवश्यक रणनीति तयार गर्न केन्द्रिय कार्यसमिति बैठक बोलाईएको प्रवक्ता भुवन पाठकले जानकारी दिनुभयो ।
यस्तै बैठकले पार्टीका रिक्त पदाधिकारी मनोनयनका विषयमा छलफल गरी उपयुक्त नेतालाई जिम्मेवारी दिने तयारी भएको नेताहरुले बताएका छन् ।
वैचारिक रुपमा निकट रहेका विभिन्न राष्ट्रवादी शक्तिसँगको एकता तथा प्रादेशिक र केन्द्रीय चुनावमा पार्टीले सफलता प्राप्त गर्न खेल्नुपर्ने भूमिकाबारे बैठकमा योजना बनाइने छ ।
प्राकृतिक विपद्मा मानवीय सहयोग तथा उद्वारका लागि पार्टीको भूमिकाको सम्भावना, देशमा विकास भएको समसामयिक राजनीतिक परिस्थितिको समीक्षा, तेस्रो चरणको स्थानीय निर्वाचनको मूल्यांकनसमेत बैठकमा गरिने छ ।
पार्टीमा कुल १६३ केन्द्रीय सदस्यको व्यवस्था गरिएकामा यही साउन २२ गते पशुपतिशम्शेर जबरा समूहले ४० प्रतिशतभन्दा बढी नेतासहितको हस्ताक्षर लिएर निर्वाचन आयोगमा दल दर्ता गराएको थियो ।
