काठमाडौं, साउन ३० ।
चुरे भावर राष्ट्रिय एकता पार्टीले भारतीय पक्षले तराईका सीमावर्ती जिल्लामा बनाएको तटबन्ध र बाँध भत्काउनका लागि तत्काल कुटनीतिक पहल थाल्न सरकार समक्ष माग गरेको छ ।
चुरे भावरको केन्द्रीय कार्य सम्पादन समितिको बैठकले वर्षाका कारण बाढी र डुबानमा परेर दर्जनौको ज्यान गएकोमा दुःख व्यक्त गर्दै सीमावर्ती क्षेत्रमा बनाएका बाँध भत्काउन माग आग्रह गरेको हो ।
‘भारतले सीमा क्षेत्रमा बनाएको उच्च सडक, बाँध र तटबन्धका कारण नेपालको तराई क्षेत्रमा डुबान भएको चुरेभावर पार्टीको ठहर छ’ चुरे भावरले भनेको छ, ‘नेपाल र नेपालीलाई क्षति हुने गरेर बनाइएका त्यस्ता संरचनाहरू हटाउने विषयमा भारतसँग कुटनीतिक पहलमार्फत तत्काल समाधान खोज्न नेपाल सरकारको ध्यानाकर्षण गराउन चाहन्छौँ ।’
पार्टीले मातहतका जिल्ला कमिटिलाई बाढी र डुबानमा परेकाको तत्कालै उद्धार कार्यमा सक्रियता पूर्वक खटन र उपलब्ध राहत वितरण गर्न पनि मातहत कमिटिलाई निर्देशन दिएको छ ।
