२१ साउन,चितवन । भरतपुर महानगरपालिका वडा नम्बर १९ मा एमालेलाई धक्का लागेको छ । पूरै प्यानलसहित वडा अध्यक्षमा काँग्रेसका कर्णवहादुर गुरुङ विजयी भएका छन् ।
मतपत्र च्यातेपछि शुक्रबार पुनः मतदान भएको उक्त वडामा एमालेले पहिलेको भन्दा भोट थपिने अपेक्षा गरेको थियो तर अवस्था त्यसको उल्टो भएको छ ।
काँग्रेसले पूरै प्यानल जितेको छ भने रेणुले मतान्तरलाई निकै घटाएकी छन् । वडा नम्बर १९ गणना सकिँदासम्म २ सय २१ मतले एमाले अगाडि छ । देवी ज्ञवालीले ४१ हजार ९ सय ४६ मत पाएका छन् भने प्रतिस्पर्धी नेकपा माओवादी केन्दकी उम्मेदवार रेणु दाहालले ४१ हजार ७ सय २५ मत ल्याएकी छिन्। ज्ञवाली मात्र २२१ मतले अगाडि छन् ।
निर्वाचन कार्यालयका अनुसार अब २० नम्बर वडाको मत गणना सुरु भइसकेको छ । रेणुले १९ मा पाएको जस्तै मत २० मा पाइन् भने जित्न देखिन्छ भने ज्ञवालीको जित सुनिश्चित हुनलाई ठूलै चमात्कार गर्नु पर्ने देखिन्छ ।
यसैबीच १९ नम्बरमा कम मत अाएपछि एमाले अध्यक्ष केपी ओलीले ज्ञवालीलाई फोन गरेर जानकारी लिएका छन् । ओली निकट स्रोतका अनुसार ओलीले ज्ञवाली र मतगणनास्थलमा रहेका नेताहरुलाई पटक पटक फोन गरेर जानकारी लिइरहेका छन् । २० नम्बरमा पनि यस्तै मत अाए एमालेले जस्तोसुकै निर्णय गर्न तयारीमा छ ।
