जनकपुरधाम, २० साउन ।
प्रधानमन्त्री शेरबहादुर देउवाले राष्ट्रिय जनता पार्टी (राजपा) चुनावमा सहभागी हुने विश्वास व्यक्त गर्नुभएको छ ।
जनकपुरधाममा आज पत्रकारहरूसँग कुराकानी गर्दै उहाँले मधेशका मुद्दाको सम्बोधन क्रमशः हुँदै गएकाले राजपालाई चुनावमा जान वातावरण बनेको बताउनुभयो ।
नेपाली काग्रेसका सभापति समेत रहनुभएका प्रधानमन्त्री देउवाले काँगे्रस संविधान संशोधन विधेयकलाई पारित गराउन अग्रसर रहेको बताउनुभयो ।
तर संविधान संशोधनमा नेकपा एमाले र राष्ट्रिय प्रजातन्त्र पार्टी बाधक देखिएको उहाँको भनाई छ ।
प्रधानमन्त्री देउवाले एशियाली विकास बैंकको आयोजनाअन्तर्गत जनकपुरमा भइरहेको सडक र ढल निर्माण कार्यमा सहयोग गर्न जनकपुरवासीसँग आग्रह गर्नुभयो ।
निर्वाचनमा नेकपा माओवादी केन्द्रलगायत इच्छुक दलसँग काँगे्रस तालमेल गर्ने पक्षमा रहेको पनि उहाँले स्पष्ट गर्नुभयो ।
