काठमाडौं, साउन १४ ।
साउन अन्तिम साता जापान जान लागेको नेपाली राष्ट्रिय फुटबल टोलीले स्थानीय टोलीहरुसँग पाँचओटा मैत्रीपूर्ण खेल खेल्ने भएको छ ।
एसियन कप छनोटअन्तर्गत् ताजकिस्तानविरुद्धको खेलको तयारीमा रहेको नेपाली टोली १० दिने जापान भ्रमणमा जान लागेको हो ।
सो क्रममा जापानका विश्वविद्यालय, क्लब र उमेर समूहका टोलीहरुसँग पाँचओटा मैत्रीपूर्ण खेल खेल्ने तयारी भएको अखिल नेपाल फुटबल संघ (एन्फा)ले जनाएको छ ।
नेपाली टोलीका प्रमुख प्रशिक्षक ग्योतोकु कोजीले एसियन कप छनोटअन्तर्गत् ताजकिस्तानविरुद्धको खेलका लागि यतिबेला २९ खेलाडीलाई प्रशिक्षण दिइरहेका छन् । प्रशिक्षणमा रहेका २९ मध्ये २४ खेलाडी जापान जाने एन्फाको भनाइ छ ।
एसियन कप छनोटअन्तर्गत् तेस्रो खेलमा नेपालले आगामी भदौमा ताजकिस्तानसँग खेल्दैछ ।
पहिलो खेलमा फिलिपिन्ससँग पराजय तथा दोस्रो खेलमा यमनसँग गोलरहित बराबरी खेलेको नेपालले घरेलु मैदानमा हुने ताजकिस्तानविरुद्धको खेलका लागि जापानबाट फर्किएपछि अन्तिम टोली सार्वजनिक गर्ने प्रशिक्षक ग्योतोकु कोजीको भनाइ छ ।
नेपाली टोली यही साउन २९ गते जापान प्रस्थान गर्नेछ ।
