देवकी तिमिल्सिना
काठमाडौँ ,१२ साउन
भरतपुर महानगरपालिका वडा नम्बर १९ मा पुनः मतदान वा मतगणना भन्ने विवादमा आजपनि सर्वोच्चले अन्तिम फैसला गर्न सकेन ।
जेठ २१ गते दायर भएको रिटमा अन्तरिम आदेश जारी हुने वा नहुने विवाद करिव दुई महिनादेखि सर्वोच्चमा हेर्दाहेदैमा छ ।
आज सरकारी वकिलका तर्फबाट महान्यायाधिवक्ता रमनकुमार श्रेष्ठले बहसलाई निरन्तरता दिनुभयो । यस्तै निर्वाचन आयोगका तर्फबाट उपस्थित कानुन व्यवसायीको बहस पनि बाँकी नै छ ।
यसअघि न्यायाधीश चोलेन्द्र शमशेर जवराको एकल इजलासले जेठ २२ गते ६ दिनका लागि पुनः निर्वाचनको निर्णय यथास्थितिमा राखी दुबै पक्षलाई छलफलमा बोलाएको थियो ।
जेठ २८ गतेदेखि दुवै पक्ष अदालतमा उपस्थित भए पनि मुद्दाको किनारा लाग्न सकेको छैन । असार ५ गते संयुक्त इजलासले भरतपुरमा च्यातिएका मतपत्र लगायतका मिसिल सर्वोच्चमा पेस गर्न आदेश दिएको थियो ।
आदेश अनुसार च्यातिएका मतपत्रको पोको सर्वोच्चमा पेस भइसकेको छ । अन्य मिसिल समेत पेस भइसकेको एक महिनाभन्दा बढी भए पनि अदालत अन्तरिम आदेशसम्वन्धी निश्कर्षमा पुग्न सकेको छैन ।
