काठमाडौं, साउन ८ । नयाँ शक्ति पार्टीमा नयाँ लफडा सुरु भएको छ । संघीय समाजवादी फोरमसँगको पार्टी एकता गर्ने अन्तिम कसरत भइरहेका बेला यथास्थितिमा कुनै पनि हालतमा पार्टी एकता हुन नहुने भन्दै नयाँ शक्तिका आर्थिक विभाग प्रमुख सुनिल खड्कासहित ५० जना सदस्यले पार्टी नेतृत्वको ध्यानाकर्षण गराएका छन् ।दुई पार्टीबीच यही साउन १५ गते एकता हुँदैछ।
उनीहरुले यथास्थितिमा पार्टी एकता भए विद्रोह गर्ने चेतावनी समेत दिएका छन् । उनीहरुले पार्टी संयोजक बाबुराम भट्टराई समक्ष तीन बुँदे सर्त राख्दै यथास्थितिमा पार्टी एकता भए विद्रोह गर्ने चेतावनी दिएका हुन् । उनीहरुले पार्टी संयोजकलाई पेश गरेका शर्तहरुमा पार्टी एकतापछि उपेन्द्र यादवलाई अध्यक्ष नमान्ने, एकीकृत पार्टीको नामबाट फोरम शब्द हटाउनुपर्ने र जबर्जस्ती एकता घोषणा गरे आफूहरु नयाँ पार्टीमा नगई नयाँ शक्तिमै बसेर काम गर्ने उल्लेख गरेका छन् ।
नयाँ बिबादका बारेमा छलफल गर्न भट्टराईले सोमबार र मंगलबार केन्द्रीय समिति बैठक डाकेका छन्। ‘हाम्रो सर्त मान्य नभए नयाँ शक्तिमै बसेर संघर्ष गर्नुको विकल्प छैन ।’ आर्थिक विभाग प्रमुख खड्काले भने, ‘फोरम नेपालसँग सती जान सकिँदैन ।’
