काठमाडौ ,३ साउन ।
सत्तारुढ दल नेकपा माओवादी केन्द्र सचिवालयको विस्तारित बैठक आजपनि बस्दैछ । हिजोबाट सुरु बैठकमा पहिलो तथा दोस्रो चरणको स्थानीय तह निर्वाचनको समिक्षाका साथै भावी रणनितिका विषयमा छलफल भइरहेको जनाइएको छ ।
राजधानीको पेरिसडाँडास्थित पार्टी केन्द्रिय कार्यलयमा बिहान ११ बजे बस्ने बैठकमा आजपनि स्थानीय तह निर्वाचनमा आएको मतपरिणामको समिक्षा, र संघ तथा प्रदेश सभा निर्वाचन रणनितिबारे छलफल हुनेछ ।
यसअघि हिजोको बैठकमा सात वटै प्रदेशका इन्चार्जले स्थानीय तह निर्वाचन परिणामको रिपोर्टिङ गरेका थिए । बैठकमा आजदेखि जिल्ला इन्चार्जहरुले रिपोर्टिङ गर्ने कार्यसुची रहेको पार्टी प्रवक्ता पम्फा भूषालले जानकारी दिनुभयो ।
बैठकमा ९९ सदस्यीय सचिवालय सदस्यका साथै, प्रदेश इन्चार्ज र सबै जिल्लाका इन्चार्जको सहभागिता रहेको छ । हिजोको बैठकमा पार्टी अध्यक्ष पुष्पकमल दाहालले पार्टीभित्र गुटबन्दी एवम् संगठन व्यवस्थित बनाउन नसक्दा स्थानीय निर्वाचनमा हार बेहोर्नुपरेको बताउनु भएको थियो ।
दुई चरणमा भएका स्थानीय तह निर्वाचनमा सोचेजस्तो नतिजा हात पार्न नसकेपछि माओवादी केन्द्रले चुनावमा पराजित हुनुको कारणबारे छलफल गर्न सचिवालय बैठक बोलाएको हो । बैठकले तेस्रो चरणको स्थानीय निर्वाचनका साथै संघ तथा प्रदेश सभा निर्वाचनको रणनिति समेत तय गर्ने जनाएको छ ।
