विराटनगर , २४ असार ।
दोस्रो चरणको स्थानीय तह निर्वाचन अन्तरगत एकमात्र महानगर विराटनगर महानगरपालीकाको प्रमुख र उपप्रमुखमा कांग्रेसको जित सुनिश्चित भएको छ ।
प्रमुखमा कांग्रेसका भीम पराजुलीले ५ हजार ३ सय १६ मतले अगाडि रहनुभएको छ । उहाँले हालसम्म १९ हजार १ सय ५१ मत पाउँनुभएको छ ।
उहाँका निकटतम प्रतिद्धन्दी एमालेका विनोद ढकालले १३ हजार ८ सय ३५ मत ल्याउदा संघीय समाजवादीका उमेश यादव १२ हजार ६ सय ७७ मत पाउनु भएको छ ।
यस्तै उपप्रमुखमा कांग्रेसकी इन्दिरा कार्कीको जित सुनिश्चित नै भएको छ । कार्कीले ६ हजार ६ सय ३७ मतको अग्रता कायम गर्नुभएको छ । कार्कीले अहिलेसम्ममा १६ हजार ६ सय ७० मत प्राप्त गर्दा उहाँका निकटतम माओवादी केन्द्रकी नमिता न्यौपानेले १० हजार ३३ र फोरम लोकतान्त्रिककी सूची चौधरीले ८ हजार ५ सय ७० मत ल्याउनु भएको छ ।
एमाले र फोरम लोकतान्त्रिक तथा संघीय समाजवादी र माओवादी केन्द्रको गठबन्धन रहेको थियो ।
१९ वटा वडा रहेको महानगरको वडा १०, ११ र १२ को १३ हजार ५ सय ३८ मत गन्ती गर्न मात्रै बाँकी रहेको मुख्य निर्वाचन अधिकृत बिनोदकुमार पोख्रेलले बताउनु भयो ।
हालसम्ममा वडा १, २, ३, ४, ५, ६, ७, ८, ९, १३, १४, १५, १६, १७, १८ र १९ को कूल ६६ हजार ९ सय ३९ मत गन्ति भइसकेको उहाँले बताउनु भयो ।
अहिले वडा १२ को मतगणना अन्तिम चरणमा पुगेको छ भने वडा ११ को आधाभन्दा बढी मत गन्ती भइसकेको र वडा १० को २ वटा मत पेटिका खोलेर गन्ति सुरु गरिएको उहाँले बताउनु भयो ।
