काठमाडौ २२ असार ।
दोस्रो चरणको स्थानीय तह निर्वाचनको मतगणना कार्य अन्तिम चरणमा पुगेको छ । निर्वाचन भएका ३ सय ३४ स्थानीय तह मध्ये हालसम्म ३ सय १७ स्थानीय तहको मतपरिणाम सार्वजनिक भइसकेको छ ।
अब विराटनगर महानगरपालिकासहित १७ स्थानीय तहको मतपरिणाम सार्वजनिक हुन बाँकी छ । मतपरिणाम सार्वजनिक भएका मध्ये १ सय ४२ स्थानमा नेकपा एमालेले जीत हासिल गरेको छ ।
यस्तै नेपाली कांग्रेस १ सय १७ स्थानमा विजयी भएका छन् भने नेकपा माओवादी केन्द्रले ३७ स्थानीय तहमा जीत हासिल गरेका छन् । राप्रपा ४ स्थानमा विजयी भएको छ । संघिय समाजवादी फोरम र फोरम लोकतान्त्रिक लगायत अन्य दल तथा स्वतन्त्र उमेदवारले १७ स्थानमा जीत हासिल गरेका छन् ।
मतगणना जारी रहेका मध्ये ८ स्थानमा नेकपा एमालेको अग्रता छ । नेपाली कांग्रेस ६ स्थानमा अघि देखिएको छ भने एक स्थानमा माओवादी केन्द्रको अग्रता छ । दुई स्थानमा अन्य दल अग्रस्थानमा छ ।
