काठमाडौं १७ असार ।
कोरियाको छुनछुन शहरमा भएको तेस्रो एसियन पारा तेक्वान्दो च्याम्पियनसिपमा नेपालकी खेलाडी रन्जना धामीले कास्य पदक हात पारेकी छिन् । ४९ केजी तौलसमुह अन्तर्गत के–५५ विधामा रन्जनाले कास्य पदक हात पारेको पारा तेक्वान्दो प्रशिक्षक कल्याण कुँवरले बताउनु भयो ।
रन्जना सेमिफाइनमा मंगोलियाकी खुरेलबातर इन्खतुयासँग १४–६ ले पराजित भएपछि कास्य पदकमै सिमित भइन् ।
पुरुषको ७५ तौल अन्तर्गत के–४२ विधामा रोहित राई क्वाटरफाइनलमा इरानका जफर्जादेह महमोदसँग पराजित भएपछि पदकविहिन भए । यसअघी रोहितले कोरियाका जाङ योन योलाई हराउँदै क्वाटरफाइनलको यात्रा तय गरेको प्रशिक्षक कविराज नेगी लामाले बताए ।
महिलाको ५८ केजी तौलसमुहको के–४४ मा नेपालकी पलेसा गोवर्धन टर्कीकी अनुभवी खेलाडी गुलदल गाम्जीसँग पराजित भइन् ।
प्रशिक्षक कविराज नेगी लामाले धेरै अनुभवी विदेशि खेलाडीविरुद्ध नेपाली खेलाडीले कडा चुनौती दिनु नै नेपालको लागि राम्रो संकेत मान्नुपर्ने प्रतिक्रिया दिए ।
