काठमाडौ १२ असार ।
आगामी बुधबार तीन प्रदेशमा हुने दोस्रो चरणको स्थानीय तह निर्वाचनका लागि आईतवारबाट मौन अवधि शुरु भएको छ । मौन अवाधि सुरु भएसँगै चुनावी प्रचार प्रसारका सम्पूर्ण गतिविधि निषेध गरिएको छ ।
प्रदेश नम्बर १, ५ र ७ का ३५ जिल्लामा हुने निर्वाचनका लागि गएराति १२ बजेपछि मौन अवधि सुरु भएको हो । मतदान हुने दिनभन्दा ४८ घन्टा अघिदेखि मतदानको काम पूरा नभएसम्मको अवधिलाई मौन अवधिका रुपमा लिइएको छ ।
मौन अवधि सुरु भएपछि मतदान कार्य सम्पन्न नभएसम्म निर्वाचन हुने पदका लागि निर्धारित क्षेत्रभित्र कुनैपनि उम्मेदवारको पक्ष वा विपक्षमा मत लिने वा दिने उद्देश्यले किसिमको प्रचार गर्न नहुने निर्देशिकामा उल्लेख छ ।
निर्वाचनको मौन अवधिमा फेसबुक ट्विटर लगायत कुनै पनि सामाजिक सञ्जाल वा अन्य कुनै माध्यमबाट समेत कसैले पनि निर्वाचनको प्रचारप्रसार गर्न नहुने जनाउँदै निर्वाचन आयोगले त्यस्ता प्रचार प्रसारका क्रियाकलाप नगर्न र मौन अवधिको पूर्ण पालना गर्न सबै पक्षसँग आग्रह गरेको छ ।
मौन अवधि पालना नगरी निर्वाचन आचारसंहिता विपरीत कुनै पनि किसिमले निर्वाचनको प्रचारप्रसार गरिएको पाइएमा त्यस्ता दल, संस्था, उम्मेदवार र व्यक्तिमाथि हदैसम्मको कारबाही हुने आयोगले जनाएको छ ।
