काठमाणडाै, ६ असार ।
दोस्रो चरणमा निर्वाचन हुने स्थानीय तहमा उम्मेदवारी दर्ता गराएकाको उम्मेदवारी फिर्ताका लागि निर्वाचन आयोगले आज बिहान ११ बजेसम्मको समय तोकेको छ ।
उम्मेदवारी मनोनयन फिर्ता लिन चाहने उम्मेदवारले आज बिहान ८ बजेदेखि बिहान ११ बजेसम्म फिर्ता लिन सक्नेछन् । उम्मेदवारी फिर्ता पछि आजै उम्मेदवारको अन्तिम नामावली सार्वजनिक गर्ने र चुनाव चिन्ह वितरण गर्ने तयारी रहेको प्रवत्ता सुर्यप्रसाद शर्माले बताउनुभयो ।
हिजो दर्ता भएका उम्मेदवारी मनोनयन विवरण अनुसार ७ पदका लागि ६६ हजार ९ सय २३ जनाको उम्मेद्वारी परेको छ । आगामी १४ गते हुने दोस्रो चरणमा १ महानगर, ७ उपमहानगर, १ सय ११ नगरपालिका र २ सय १५ गाउँपालिकामा निर्वाचन हुन लागेको छ । ती स्थानबाट १५ हजार ३८ जनप्रतिनिधी चुनिने आयोगले जनाएको छ । ६४ लाख ३२ हजार ७ सय ६५ जना मतदाताले मतदानमा भाग लिन पाउनेछन् ।
निर्वाचनका लागि कुल ८ हजार ३ सय ६४ मतदान केन्द्र तोकिएको छ । प्रदेश नम्बर १ मा एक महानगर, २ उपमहानगर, ४६ नगरपालिका र ८८ गाउँपालिकासहित १ सय ३७ स्थानीय तह छन् । प्रदेश नम्बर ५ मा चार उपमहानगर, ३२ नगरपालिका र ७३ गाउँपालिका सहित १ सय ९ स्थानीय तह छन् । प्रदेश नम्बर ७ मा एक उपमहानगर, ३३ नगरपालिका र ५४ गाउँपालिकासहित कुल ८८ स्थानीय तह छन् ।
