काठमाडौं , असार ३ ।
निवार्चन आयोगले आगामि असार १४ गते हुने दोस्रो चरणको स्थानीय तह निर्वाचनको सम्पुर्ण तयारी पुरा भएको जनाएको छ ।
मनोनयन दर्ताको अघिल्लो दिन आज राजधानीको कान्तिपथस्थित केन्द्रिय कार्यालयमा पत्रकार सम्मेलन गर्दै आयोगले प्रदेश नम्बर १, ५ र ७ का ३५ जिल्लाका ३ सय ३४ स्थानीय तहमा हुने निर्वाचनको सम्पुर्ण तयारी पुरा भएको जनाएको हो ।
कार्यक्रममा बोल्दै प्रमुख निर्वाचन आयुक्त अयोधीप्रसाद यादवले दोस्रो चरणको निर्वाचनमा एक महानगर सहित ७ उपमहानगर, १ सय ११ नगरपालिका र २ सय १५ गाउँपालिकामा निर्वाचन हुने जानकारी दिनुभयो ।
निर्वाचनमा ६४ लाख ३२ हजार ७ सय ६५ मतदाताले मतदान प्रक्रियामा भाग लिने आयोगले जनाएको छ । दोस्रो चरणको निर्वाचनबाट १५ हजार ३८ जनप्रतिनिधि निर्वा्चित हुनेछन् ।
निर्वाचनका लागि ४ हजार ५ सय ८१ मतदान स्थलमा ८ हजार ३ सय ६४ मतदान केन्द्र रहने आयोगले जनाएको छ ।
दोश्रो चरणको निर्वाचनमा सुरक्षाकर्मी बाहेक ६६ हजार ९ सय कर्मचारी खटिने प्रमुख आयुक्त यादवले जानकारी दिनुभयो ।
साथै उहाँले निर्वाचनमा आवश्यक पर्ने सबै सुरक्षा व्यवस्था मिलाउन सरकारले प्रतिबद्धता व्यक्त गरेको पनि बताउनु भयो ।
आयोगले निर्वाचनमा मनोनयन दर्ताका लागि भोली बिहान ८ बजेदेखि अपरान्ह ४ बजे सम्मको समय तोकेको छ ।
त्यस्तै मतदाता शिक्षालाई प्रभावकारी बनाउन आयोगले प्रति मतदान केन्द्रमा कम्तीमा एक जना मतदाता शिक्षा कार्यकर्ताका दरले ८ हजार ३ सय ५० कर्मचारीलाई परिचालन गरेको बताएको छ ।
