काठमाडौं ,जेष्ठ ३० ।
एएफसी एसियन कप छनौट अन्तर्गत आफ्नो दोस्रो खेलमा नेपालले यमनसँग गोल रहित बराबरी खेलेको छ ।
राजधानीको हल्चोकस्थित सशस्त्र प्रहरीको मैदानमा भएको खेल बराबरीमा सकिएपछि छनौट खेलमा नेपालले पहिलो अंक जोडेको छ ।
योसँगै सन् २०१९ मा हुने एसियन कप फुटवल खेल्ने नेपालको सम्भावना कायमै रहेको छ ।
अधिकांश खेल आफ्नो नियन्त्रणमा राखेपनि नेपालले गोल गर्न भने सकेन । गोल गर्ने करिब आधा दर्जन सुनौला अवसर नेपालले खेर फालेको थियो ।
बिपक्षीका ७ वटा प्रहार असफल बनाएका नेपालका गोलकिपर किरण चेम्जोङ म्यान अफ द म्याच घोषित भए । नेपाल पहिलो खेलमा फिलिपिन्ससंग ४–१ ले पराजित भएको थियो भने यमनले ताजाकिस्तानलाई २–१ ले हराएको थियो ।
नेपाल सहित ४ टोली सहभागी समुह एफबाट शीर्ष स्थानमा रहने २ टोली आसन्न एसियाकपका लागी छनौट हुनेछन् । छनौट चरणको आफ्नो अन्तिम खेलमा नेपालले ताजाकिस्तानसँग प्रतिस्पर्धा गर्नेछ ।
