बाँके, जेठ ३०।
बाँकेको नेपालगञ्जमा नेपाली कांग्रेसका मेयर पदका उम्मेदवारले चुनावी प्रचार प्रसारमा प्रयोग गरेका गाडी माथि तोडफोड भएको छ ।
आज बिहान त्रिभुवन चोकमा नेपालगञ्ज उपमहानगरपालिकाका मेयर उम्मेदवार डाक्टर सुरेशकुमार कनौडीयाले प्रयोग गरेका बा १४ च १३८७ नम्बरको जीपमा तोडफोड भएको हो ।
प्रहरीले तोडफोडमा संलग्न रहेको भन्दै राजपा नेता ललित रौनीयारलाई पक्राउ गरेको छ ।
उता महोत्तरीको औरही गाउँपालिकामा नेकपा एमालेका सांसद चढेको गाडी माथि पनि ढुङ्गामुढा प्रहार भएको छ । महोत्तरी क्षेत्र नम्बर ५ का एमालेका सांसद दिपनारायण साह सवार गाडी बन्दमा चलाएको भन्दै राजपा नेपालका कार्यकर्ताहरुले आज विहानै ढुङ्गामुढा प्रहार गरेका छन् ।
बर्दिबास औरही जलेश्वर सडक खण्ड अन्तर्गत औरही बजारमा सडक बन्द गरिरहेका राजपाका कार्यकर्ताहरुले सांसद सवार बा १२ च ९६९ नम्बरको गाडीमाथि ढुङ्गमुढा गरेका हुन् ।
ढुङ्गामुढाबाट सांसद साहको गाडीको अगाडि र पछाडिको सिसा फुटेको छ ।
