काठमाडौं २० जेठ ।
प्रथम प्रधानमन्त्री कप क्रिकेट प्रतियोगिताको सेमिफाईनल समिकरण पुरा भएको छ ।
आज भएको समूह चरणको अन्तिम खेलमा मध्यमाञ्चललाई ६ विकेटले हराएर एपीएफ समूह ए को विजेता बनेसँगै सेमिफाइनलमा समिकरण तय भएको हो ।
समूह ए मा लगातार तीन खेल जित्दै एपीएफ समूह विजेता बन्दा पश्चिमाञ्चल उपविजेता बन्यो ।
आज दिउसो कीर्तिरपुरस्थति टीयू मैदानमा मध्यमाञ्चलका हसिम अन्सारीले जारी प्रतियोगिताकै पहिलो शतक प्रहार गरेपनि जितका लागि पर्याप्त भए ।
अन्सारीको शतक मद्दतमा टस हारेर पहिले ब्याटिङ गरेको मध्यमाञ्चलले ४८.३ ओभरमा अलआउट हुनुअघि १८८ रन बनाए । १२४ बल खेलेका अन्सारीले १२ चौका र १ छक्काको मद्दतमा १०१ रन बनाए । नियमित कप्तान शरद भेषावकरको अनुपस्थितीमा अन्सारीले कप्तानी समेत सम्हालेका थिए ।
सोनु तामाङले २७ तथा रसिद खानले ११ रन बनाउनुबाहेक मध्यमाञ्चलका अन्य खेलाडीले दोहोरो अंक छुन सकेनन् ।
एपीएफका कप्तान ज्ञानेन्द्र मल्लले ४ तथा अभिनसा बोहरा र भुवन कार्कीले समान २ विकेट लिए ।
जवाफमा अनिल शाहले नटआउट ७८ रन बनाएपछि एपीएफले १८८ रनको लक्ष्य ३४ ओभरमा ५ विकेट गुमाएर पूरा र्गयो। ८५ बल खेलेका शाहले ११ चौका र २ छक्का समेत प्रहार गरे ।
यस्तै ओपनर सन्दीप सुनारले ४१ तथा आसिफ शेखले २२ रनकव योगदान गरे भने कप्तान ज्ञानेन्द्र २८ रनमा नटआउट रहे । बलिङमा मध्यमाञ्चलका शसी केशरीले ३ विकेट लिए ।
एपीएफले अब विभागीय डर्बीमा सोमबार पहिलो सेमिफाइनल खेल नेपाल पुलिससँग खेल्नेछ । यस्तै अर्को सेमिफाइनल समूह बी को विजेता त्रिभुवन आर्मी र पश्चिमाञ्चलबीच मगलबार हुनेछ ।
