काठमाण्डौ ,२० जेठ ।
निर्वाचन आयोगले मतपत्र च्यातिएपछि विवादीत बनेको चितवनको भरतपुर महानगरपालिकामा पुन मतदान गर्ने निर्णय गरेको छ ।
आज बसेको आयोगको बैठकले मतगणनाको क्रममा मतपत्र च्यातिएपछि स्थगित भएको भरतपुर महानगरको वडा नम्बर १९ मा पुन मतदान गर्नुपर्ने निष्र्कष निकालेको हो ।
अनुगमन टोलीले तयार पारेको प्रतिवेदन अध्ययन गर्दा मतगणना स्थलको अनाधिकृत कब्जा भएको भन्ने पुष्टि भएको उल्लेख गर्दै निर्वाचन आयोगले वडा नम्बर १९ को मतदान केन्द्रलाई अवैध घोषित गरेर मतदान रद्ध गर्ने निर्णय गरेको हो ।
आयोगको बैठकले रद्ध गरिएको मतदान केन्द्रको पुन मतदान गराउन भरतपुर महानगरका चितवनका मुख्य निर्वाचन अधिकृतलाई निर्देशन समेत दिएको छ ।
गत जेठ १४ गते राती भरतपुर महानगरको वडा नम्बर १९ को मतगणनाको क्रममा ९० वटा मतपत्र च्यातिएको थियो ।
उता , प्रमुख प्रतिपक्षी दल नेकपा एमालेले निर्वाचन आयोगको निर्णयमा आपत्ती जनाउँदै आन्दोलन गर्ने चेतावनी दिएको छ ।
एमाले अध्यक्ष केपी शर्मा ओलीले आयोगको निर्णय आपत्तीजनक भएको बताउदै आन्दोलनका कार्यक्रम घोषणा गरेर अघि बढ्ने चेतावनी दिनुभयो ।
