भरतपुर ,१४ जेठ ।
भरतपुर महानगरपालिकाको निर्वाचन परिणाम भाेली (सोमबार) गणतन्त्र दिवसका दिन आउने भएको छ।
आइतबार साँझसम्मको मतगणना अनुसार, मेयर पदमा नेकपा एमालेका उम्मेदवार देवी ज्ञवालीले ४१ हजार चार सय २१ मत ल्याउनु भएको छ। उहाँलाई पछ्याउँदै नेकपा माओवादी केन्द्रकी उम्मेदवार रेणु दाहालले ४० हजार ६ सय ६६ मत प्राप्त गर्नुभएको छ।
उपमेयर पदमा नेपाली कांग्रेसकी पार्वती शाहले ४४ हजार ६ सय ४८ मत प्राप्त गरी जित सुनिश्चित गर्नुभएको छ। शाहकी निकटतम प्रतिस्पर्धी एमालेकी दिव्या शर्माले ३८ हजार ६९ मत प्राप्त गर्नुभएको छ। मतगणना हुन बाँकी दुई वडाको कुल मत संख्या ६ हजार एक सय ६२ रहेकोले शाहको जित सुनिश्चित भएको हो।
कुल २९ वडा रहेको भरतपुरका २७ वडाको नतिजा आइसकेको छ। मतगणना परिणम अनुसार, २९ वडामध्ये १४ वडामा एमाले, १० वडामा नेपाली काँग्रेस र तीन वडामा माओवादी केन्द्रका उम्मेदवार विजयी हुनु भएको छ।
वडा नम्बर १९ र २० को मतगणनाको अन्तिम नतिजा आउन बाँकी छ। एक लाख ५० हजार दुई सय ७४ मतदाता रहेको भरतपुर महानगरपालिकामा एक लाख १२ हजार सात सय ४१ मत खसेको थियो।
चितवन जिल्लामा एक महानगरपालिका, पाँच नगरपालिका र एक गाउँपालिकाबाट पाँच सय चार जना जनप्रतिनिधि निर्वाचित गर्न दुई लाख ४० हजार एक सय ८६ जना मतदाता मतदानमा सहभागी भएका थिए। सात वटा स्थानीय तह अन्तर्गत कुल ९८ वडा रहेका छन्।
