ललितपुर, ९ जेठ । पहिलो चरणमा स्थानिय तह निर्वाचन भएको मुलुकका चार महानगरपालीका मध्ये एकको नतिजा सार्वजनिक भएको छ ।ललितपुर महानगरपालिकाको मेयरमा चिरीबाबु महर्जन विजयी हुनुभएको छ ।
अत्यन्तै झिनो मतअन्तरका साथ अग्रता लिइरहेका महर्जन अन्ततः ३६५ मत अन्तरले मेयर निर्वाचित हुनु भएकाे हाे। मंगलबार राति साढे १ बजे घोषित अन्तिम नतिजाअनुसार महर्जनले २४६६६ मत पाएको ललितपुरका कांग्रेस सांसद चन्द्र महर्जनले जानकारी दिनुभयाे । उहाँका अनुसार निकटतम प्रतिद्वन्द्वी नेकपा एमालेका हरिकृष्ण व्यञ्जनकारको पक्षमा २४३०१ मत परेको छ।
त्यस्तै, उपमेयरमा नेपाली कांग्रेसकी गीता सत्याल १९२३६ मत ल्याएर विजयी हुनुभएकाे छ ।उहाँकी निकटतम प्रतिद्वन्द्वी साझा पार्टीकी शोभा शाक्यले १४४३३ मत पाउनु भयाे ।
ललितपुर महानगरपालिका जितेसँगै कांग्रेस विजयी भएका स्थानीय तहको संख्या १०४ पुगेको छ ।
नेकपा एमाले भने ११९ स्थान जित्दै पहिलो पार्टी बनेको छ । तेस्रो स्थानको माओवादी केन्द्रले ४६ स्थान जितेको छ ।
