काठमाडौं, बैशाख ३० ।
नेत्रविक्रम चन्द विप्लवले नेतृत्व गरेको नेपाल कम्युनिष्ट पार्टीले आज नेपाल बन्दको आव्हान गरेको छ ।
आजको बन्द सफल पार्न हिजो राजधानीलगायत देशका विभिन्न स्थानबाट एकसाथ मशाल जुलुससमेत निकालेको पार्टीले जनाएको छ ।
मशाल जुलुस पूर्वको मेची, कोशी, पूर्व ताम्सालिङ, पश्चिम ताम्सालिङ, गण्डक, भेरी, कर्णाली, सेती, महाकाली ब्यूरोले शहर र सदरमुकाममा एकै समय पारेर मशाल जुलुस निकालिएको हो ।
आज आव्हान गरिएको नेपाल बन्दको प्रभाव राजधानीलगायत देशभर परेको माओवादी पार्टीले जनाएको छ । आजको बन्दको क्रममा अहिले कुनै पनि अप्रिय घटना नघटेको पनि पार्टीले जनाएको छ ।
साथै आजको नेपाल बन्द पूर्ण रूपमा सफल पार्न उद्योग, शिक्षण संस्था, बजार, कलकारखाना संचालकहरूसँग नेकपाले आग्रह गरेको छ ।
बन्द सफल पार्न जनसमुदायको साथमा प्रभावकारी भूमिका निभाउन पनि नेता तथा कार्यकर्तालाई अपिल गरेको छ ।
आफ्नो पूर्वघोषित शान्तिपूर्ण राजनीतिक अभियान सरकारले गैरकानूनी रूपमा पार्टीका नेता तथा कार्यकर्ता र समर्थकहरूलाई धरपकड र झूठा मुद्दा लगाएर पक्राउ गरेको विरोधमा नेकपाले आज नेपाल बन्द घोषणा गरेको हो ।
यसैबीच, प्रहरीले नेपाल कम्युनिष्ट पार्टीका सुनसरी जिल्ला सेक्रेटरी उदय राईसहित दर्जनभन्दा बढी नेता तथा कार्यकर्तालाई प्रहरीले हिजो साँझ पक्राउ गरेको छ । पक्राउ परेका राईलाई बिना शर्त अबिलम्ब रिहा गर्न पार्टीले मागसमेत गरेको छ ।
