काठमाडौं ।
नेपाल कम्युनिस्ट पार्टी (नेकपा)ले नेपाल बन्दको पूर्वसन्ध्यामा अा साँझ देशभर मशाल जुलुस निकालेको छ । शुक्रबार साँझ ७ बजे काठमाडौं उपत्यका लगायत देशभर मशाल जुलुस निकालेको नेकपाले जनाएको छ ।
एकै समय पारेर पूर्वको मेची, कोशी, पूर्व ताम्सालिङ, पश्चिम ताम्सालिङ, गण्डक, भेरी, कर्णाली, सेती, महाकाली ब्यूरोले शहर र सदरमुकाममा मशाल जुलुस निकालेका छन् ।
भोलि (बैशाख ३० गते)को लागि आयोजना नेपाल बन्दको प्रचारको लागि मशाल जुलुस निकालेको नेकपाले जनाएको छ ।
साथै नेपाल बन्द गरेर सहयोग गर्न उद्योग, शिक्षण संस्था, बजार, कलकारखाना संचालकसँग नेकपाले आग्रह गरेको छ । बन्द सफल पार्न जनसमुदायको साथमा प्रभावकारी भूमिका निभाउन पनि नेता तथा कार्यकर्तालाई अपिल गरेको छ ।
आफ्नो पूर्वघोषित शान्तिपूर्ण राजनीतिक अभियान सरकारले गैरकानूनी रुपमा पार्टीका नेता तथा कार्यकर्ता र समर्थकलाई दमन, धरपकड, गिरफ्तार र झुठा लगाएको विरोधमा नेकपाले भोलि शनिबार नेपाल बन्द घोषणा गरेको थियो ।
- फाइल फोटो
