काठमाडौं, बैशाख २९ ।
जारी रहेको इण्डियन प्रिमियर लिग (आईपीएल) क्रिकेटअन्तर्गत गएराति भएको खेलमा मुम्बई इण्डियन्सलाई हराउँदै किंग्स इलेभेन पञ्जाबले प्लेअफमा पुग्ने सम्भावनालाई जीवित राख्न सफल भएको छ ।
गएराति मुम्बईको वाङ्खडे रंगशालामा भएको सो खेलमा पाहुना टोली पञ्जाब ७ रनले विजयी भएको छ । पञ्जाबले दिएको २ सय ३१ रनको विशाल लक्ष्य पछ्याएको मुम्बई निर्धारित २० ओभरमा ६ विकेट गुमाएर २ सय २३ रनमै समेटियो । मुम्बईका लेण्डल सिमोन्सले ३२ बलमा ५९ रन तथा काईरन पोलार्डले २४ बलमा अविजित ५० रन बनाए ।
खेलको अन्तिम ३ बलमा जितका लागि ९ रन चाहिएको अवस्थामा पञ्जाबका मोहित शर्माले मुम्बईका पोलार्डलाई लगातार दुई डट बल फालेपछि पञ्जाब विजयी भएको हो ।
यसअघि खेलमा पहिले व्याटिङ गरेको पञ्जाबले निर्धारित २० ओभरमा ३ विकेट गुमाउँदै २ सय ३० रन बनाएको थियो । पञ्जाबका लागि ऋद्धिमन शाहले ५५ बलमा अविजित ९३ रन बनाए । ग्लेन म्याक्सवेलले २१ बलमा ४७ रन जोड्दा मार्टिन गुप्टिलले १८ बलमा ३६ रनको योगदान दिए ।
म्याचमा कूल ४ सय ५३ रन बन्यो । एउटै म्याचमा यति धेरै रन बनाएको आईपीएलको इतिहासमै यो पहिलो पटक हो ।
गएरातिको जितपछि पञ्जाबले जारी आईपीएलको प्ले अफमा पुग्ने सम्भावना बलियो पारेको छ । मुम्बई भने यसअघि नै प्लेअफमा पुगिसकेको छ ।
