काठमाडौं, बैशाख २८ ।
सर्वाधिक पुरस्कार राशि भएको एकदिवसीय प्रधानमन्त्री कप क्रिकेट प्रतियोगिता आगामी जेठ ९ गतेबाट सञ्चालन हुने भएको छ ।
राष्ट्रिय खेलकुद परिषद् (राखेप)को आयोजना तथा काठमाडौं क्रिकेट ट्रेनिङ सेन्टरको व्यवस्थापनमा उक्त प्रतियोगिता हुने आज आयोजित पत्रकार सम्मेलनमा जानकारी दिइएको छ ।
उक्त प्रतियोगितामा पाँच विकास क्षेत्रसहित नेपाल प्रहरी, नेपाली सेना र सशस्त्र प्रहरी बल (एपिएफ)ले प्रतिस्पर्धा गर्ने राखेपका सदस्य सचिव केशव कुमार विष्टले जानकारी दिए ।
प्रतियोगिताको विजेता टोलीले ट्रफीसहित रु. २० लाख तथा उपविजेताले रु. १० लाख प्राप्त गर्ने छन् । सेमिफाइनल पुग्ने टोलीले रु. ५० हजार, म्यान अफ दी सिरिजले रु. एक लाख तथा उत्कृष्ट ब्याट्सम्यान र उत्कृष्ट बलरले रु ५० हजार पुरस्कार पाउने जनाएको छ ।
नेपाली राष्ट्रिय क्रिकेट टोलीका प्रमुख प्रशिक्षक जगत टमाटाले सम्भावना बोकेका खेलाडीका लागि उक्त प्रतियोगिता महत्वपूर्ण हुने बताए ।
लिगकम नकआउटको आधारमा खेलाइने उक्त प्रतियोगिताका सहभागी टोलीलाई तयारी खर्च स्वरूप रु ५० हजार प्रदान गरिने आयोजकले जनाएको छ ।
उक्त प्रतियोगिताको सम्पूर्ण खेल जेठ २४ गतेसम्म सञ्चालन कीर्तिपुरस्थित त्रिवि क्रिकेट मैदानमा हुने जनाएको छ ।
