२७ बैशाख ,काठमाडौं ।
नेपाल कम्युनिस्ट पार्टी (नेकपा)ले सरकारले अनाहकमा आफ्ना नेता तथा कार्यकर्तालाई पक्राउ गरी चरम यातना र झुठा मुद्दा लगाउने हर्कत गरेको भन्दै गिरफ्तार सबैलाई अविलम्ब रिहा गर्न माग गरेको छ ।
नेकपा गण्डक ब्यूरो इन्चार्ज सावित्रा दूराले एक प्रेस विज्ञप्ति जारी गर्दै हप्ता दिनयता कास्कीलगायत विभन्न जिल्लाबाट गिरफ्तार १५ जनालाई तत्काल रिहा गर्न माग गरेकी छन् । कास्की पोखराबाट दिब्या गुरुङ, रामजी बराल र राजकुमार सुनारलाई गत आइतबार प्रहरीले गिरफ्तार गरी हिरासतमा राखेको जनाएको छ ।
त्यस्तै युवराज बास्तोला, तेजबहादुर केसी र मनबहादुर तामाङ, खुशीमान परियार, धनबहादुर तामाङ र चित्रबहादुर गुरुङलगायतलाई प्रहरीले बिनाकारण पक्राउ गरी झुठा मुद्दमा फसाउने कोशिस गरिरहेको जनाइएको छ ।
मंगलबार साँझ गण्डक ब्यूरो सदस्य एवं कास्की जिल्ला सेक्रेटरी नन्दलाल तिवारीलाई प्रहरीले गिरफ्तार गरेको भन्दै आपत्ति जनाएकी छन् । तिवारी लगायत गिरफ्तार सबैलाई सरकारले झुठा मुद्दामा फसाउने कोशिस गरिरहेको उल्लेख गर्दै त्यसविरुद्ध आवाज उठाउन जनसमुदायमा अपिल समेत गरेकी छन् ।
साथै, सरकारले फासिवादी शैली देखाएको भन्दै जनसमुदायसँग निर्वाचन खारेजी अभियानमा आर्थिक, भौतिक, नैतिक सहयोग, समर्थन र ऐक्यवद्धता व्यक्त गरिदिनुहुनका निम्ति अनुरोध गरेकी छन् ।
तत्काल रिहाई नगरे कडा संघर्ष घोषणा गर्न बाध्य हुने चेतावनी इन्चार्ज दूराले दिएकी छन् ।
