काठमाडौँ, २७ वैशाख ।
अखिल नेपाल खेलकुद सङ्घले ५० औँ एसियन बडी बिल्डिङ एन्ड स्पोर्ट च्याम्पियनसिपका स्वर्ण पदक विजेता महेश्वर महर्जनलाई सम्मान गरेको छ ।
प्रधानमन्त्रीको सरकारी निवास बालुवाटारमा आयोजना गरेको कार्यक्रममा प्रधानमन्त्री पुष्पकमल दाहालले महर्जनलाई सम्मान गरेका हुन् ।
महर्जनलाई सम्मान गर्दै प्रधानमन्त्री दाहालले खेलकुद विकासका लागि सरकारले सक्दो प्रयास गर्ने प्रतिबद्धता समेत ब्यक्त गरे ।
खेलकुदको विकासले युवाको शारीरिक र बौद्धिक विकास गर्नुका साथै देशको गरिमा र स्वाभिमान उच्च राख्ने प्रधानमन्त्रीको भनाइ छ ।
महर्जनले सन् २०१६ सेप्टेम्बरमा भुटानमा सम्पन्न ५० औँ एसियन बडी बिल्डिङ एन्ड स्पोर्ट च्याम्पियनसिनमा ७५ केजी तौल समूहमा स्वर्ण पदक प्राप्त गर्नुभएको हो ।
कार्यक्रममा युवा तथा खेलकुदमन्त्री दलजीत श्रीपाइलीको समेत उपस्थिति रहेको थियो ।
