काठमाडौँ,वैशाख २७। दिनभरि भोट माग्न व्यस्त हुने उम्मेदवारसँगै अधिकांश दलका कार्यकर्ता साँझ परेपछि सहरका स–साना भट्टी छिर्छन् । अलिक पैसा हुने र उपल्लो तहका कार्यकर्ता भने गतिला र राम्रा रेस्टुरेन्ट पस्छन् । सिन्धुपाल्चोक, रामेछाप र सिन्धुलीका सदरमुकाम तथा स्थानीय स–साना बजार पछिल्ला दिन यिनै ग्राहकले गुल्जार छन् । स्थानीय होटल व्यवसायीका अनुसार चुनावको दिन नजिकिँदै जाँदा मदिराको खपत ह्वात्तै बढेको छ । मदिरा डिलर सञ्चालक भन्छन्, ‘मागअनुसार पुर्याउनै हम्मे छ ।’
चौतारा साँगाचोकगढी नगरपालिकामा मात्रै मदिरा बेच्ने २४ वटा होटल छन् भने सातवटा मदिराका डिलर । त्यस्तै बाह्रबिसे नगरपालिकामा चार र मेलम्चीमा मदिराका आठ वितरक छन् । स्थानीय व्यवसायीका अनुसार पछिल्ला दिन प्रमुख तीन नगरपालिकामा मदिरा जस्ता पेय पदार्थको बिक्री बढेको छ । कतिसम्म भने माघ अन्तिम सातायता विभिन्न दलले मदिराजन्य पदार्थ खरिद गर्न होटलदेखि वितरक केन्द्र नै तोकेका छन् । चौतारा साँगाचोकगढी नगरपालिकाको चौतारा बजारमा होटल गौरीशंकरका सञ्चालक अर्जुन सापकोटा भन्छन्, ‘वैशाख सुरु भएसँगै मदिराको बिक्री तेब्बर बढेको छ ।’
होटल गौरीशंकर एन्ड ड्रिंक्सले गत चैतमा ३० हजार रुपैयाँबराबरको मदिरा बेचेको थियो तर वैशाखको तीन साताभित्रै ८० हजार रुपैयाँको मदिरा कारोबार गरिसकेको छ । मदिराका वितरकसमेत रहेका सञ्चालक सापकोटाका अनुसार मदिरा खपत सहरभन्दा गाउँमा धेरै छ । उनले भने, ‘चैतमा ५० कार्टुन मदिरा बेचेको थिएँ, वैशाखमा भने २ सय कार्टुन बेचिसकें ।’ सिन्धुपाल्चोक गेस्ट हाउस एन्ड ड्रिंक्स वितरकका प्रोपाइटर सुवास पुरीले पनि चुनावी चहलपहल सुरु भएपछि धेरै मदिरा बेचिसके ।
चैतमा २७ हजारको मदिरा बेचेका उनले वैशाखयता भने ८० हजार रुपैयाँबराबरको बेचिसके । चौतारामा रहेको चौतारा नास्ता सेन्टरबाट पनि वैशाखमा अघिल्लो महिनाभन्दा दोब्बर मदिरा बिकिसक्यो । प्रोपाइटर कृष्णमान श्रेष्ठका अनुसार चैतमा २७ हजारको बेचेकोमा वैशाखयता ६० हजार नाघिसक्यो । शेर्पा होटलको कारोबार पनि उस्तै छ । प्रोपाइटर रिना शेर्पाका अनुसार मदिरा कारोबार चैतमा ३० हजारबराबर रहेकामा वैशाखको तीन सातामै ८० हजार पुगिसक्यो ।
बोल्ड ड्रिंक्सका प्रोपाइटर लक्ष्मी श्रेष्ठका अनुसार दलहरू गाउँमुखी प्रचार अभियानमा सक्रिय भएका कारण सहरभन्दा गाउँका खुद्रा पसल र स–साना होटलले सामान्य दिनभन्दा तेब्बर बढी मदिराजन्य पदार्थ किनेर लगेका छन् । उनले हाँस्दै भनिन्, ‘दलले पार्टीगत रूपमै मदिरा केन्द्र र होटल तोकेका छन् ।’
सदरमुकाम आसपासका घलेगाउँ, गौराती, स्याउले, कुभिन्डे, चतुरेगाउँका सानातिना होटलमा मदिरालगायत पेय पदार्थको व्यापार हवात्तै बढेको व्यवसायीको भनाइ छ । सदरमुकाममा सातवटासम्म मदिरा वितरक भए पनि चार जनाले मात्रै लाइसेन्स लिएका छन् । रामेछाप सदरमुकाम मन्थली सहर उति ठूलो होइन तर पनि यहाँ चुनाव लागेपछि मदिरा खपत हवात्तै बढेको छ । स्थानीयका अनुसार दिनभर भोट माग्न गाउँ पसेका उम्मेदवार र अगुवा कार्यकर्ता साँझ परेपछि सहरका सुविधासम्पन्न र मदिरा पाइने होटल–लजमा बस्न पुग्छन् ।
मन्थलीका एक होलसेल मदिरा विक्रेताका अनुसार माघ महिनामा उनले ६ लाख रुपैयाँ बराबरको मदिरा बेचेका थिए । यो परिमाण वैशाखका तीन सातामै दोब्बर भइसक्यो । वैशाख लागेयता मात्रै १२ लाख ७७ हजारको मदिरा बेचिसकेको उनले बताए ।
जिल्ला प्रहरी कार्यालय मन्थलीका अनुसार गाउँघरमा घरेलु मदिरा बिक्रीको मात्रा पनि उत्तिकै बढेको छ । केही दलले त गाउँमा कार्यकर्तालाई मदिरा खुवाउन भट्टी नै सञ्चालनमा ल्याएका छन् । प्रहरीले गाउँबाट सदरमुकाम बिक्रीका निम्ति ल्याइँदै गरेको झन्डै ११ सय लिटर घरेलु मदिरा बरामद गरिसकेको छ ।
सिन्धुलीमा पनि मदिराका प्रमुख विक्रेतालाई माग धान्न नसकेर हैरानी छ । जिल्लामा मदिराका मुख्य तीन डिलर छन् । तिनका अनुसार वैशाख २४ गतेसम्म मात्रै २ करोड ४५ लाख रुपैयाँभन्दा धेरैको कारोबार भइसक्यो । खुला रूपमा स–साना पसलेले र बाह्य जिल्लाबाट आफ्नै स्रोतबाट ल्याएर बेच्नेहरूको हिसाबसमेत जोड्ने हो भने यो कारोबार झन् धेरै हुन्छ ।
कनिष्का ट्ेरडर्सले चैतमा मात्रै एक करोड रुपैयाँबराबरको मदिरा बेचेको थियो । तर, वैशाख २४ गतेसम्म कारोबार उकालो लागेर १ करोड १० लाख पुगिसक्यो । नवदुर्गा ट्रेडर्सले चैतमा ७० लाखको मदिरा बेचेकोमा वैशाख २४ सम्म थप ८५ लाख रुपैयाँको बेचिसक्यो । उद्योग वाणिज्य संघ सिन्धुलीका अध्यक्षसमेत रहेका ट्ेरडर्स सञ्चालक दिनेशकुमार श्रेष्ठका अनुसार वैशाखभरिमा एक करोडभन्दा धेरैको मदिरा बिक्री हुने देखिन्छ । उनले भने, ‘चुनाव नजिकिँदै गर्दा मदिराको माग पनि बढदै छ, पुर्याउनै गाह्रो भएको छ ।’
सीता मार्केटिङ जिल्लाको अर्को ठूलो मदिरा डिलर हो । यसका प्रमुख लेखापाल उद्धव मगरका अनुसार चुनाव घोषणासँगै जिल्लाका स–साना उपडिलरले अरू बेलाभन्दा दोब्बर मदिरा ‘स्टोर’ गरेका थिए । अरू महिना औसत ५० लाखको मदिरा बेच्ने ट्रेडर्सले चैतमा मात्रै १ करोड १० लाख बेचेको थियो । वैशाख २४ सम्म थप ६० लाखको बिक्री भइसकेको मगरले जानकारी दिए । उनका अनुसार सहरमा भन्दा गाउँमा माग उच्च छ । ‘धेरैजसो उपडिलरले चुनावमा धेरै मदिरा बिक्री हुन्छ भनेर चैतमै स्टोर गरेका हुन्,’ उनले भने ।– कान्तिपुर दैनिकबाट
