काठमाडौँ, २५ वैशाख ।
सत्तारुढ दल नेपाली काँग्रेसले कार्यपालिका, व्यवस्थापिका र न्यायपालिकाबीचका क्षेत्राधिकारमा देखिएका समस्यालाई संविधानसम्मत् समाधान खोजिने जनाएको छ ।
स्थानीय तह निर्वाचनका पछिल्ला गतिविधिबारे जानकारी दिन पार्टी केन्द्रीय कार्यालय सानेपामा आज आयोजित पत्रकार सम्मेलन मार्फत काग्रेसले कार्यपालिका, व्यवस्थापिका र न्यायपालिकाबीच पछिल्लो समय क्षेत्राधिकारका बिषयमा देखिएका बिबादबारे निर्वाचनपछि मात्रै आधिकारीक धारणा सार्वजनिक गर्ने जनाएको हो ।
केन्द्रीय प्रचारप्रसार समन्वय उपसमितिका संयोजक रमेश लेखकले तीनै निकाय आ आफ्नो क्षेत्राधिकारभित्र रहेर काम गर्नुपर्ने भन्दै अहिले काग्रेस बिबादमा नफसी निर्वाचनमा केन्द्रित भएको बताउनु भयो ।
संयोजक लेखकले संविधानलाई सर्वस्वीकार्य बनाउन संविधान संशोधन गर्न लागिएको र संविधान कार्यान्वयन गर्न स्थानीय तहको निर्वाचन हुन लागेको चर्चा गर्दै यी दुवै कार्य सरकारले एकसाथ अगाडि बढाएको उल्लेख गर्नुभयो ।
तराई÷मधेस एवम् अन्य समुदायले उठान गरेका माग संविधान संशोधनमार्फत सम्बोधन हुने चर्चा गर्दै उहाँले छिट्टै संविधान संशोधनको प्रस्ताव पारित हुने विश्वाससमेत व्यक्त गर्नुभयो ।
यस्तै संयोजक लेखकले चितवन, धादिङलगायत केही जिल्लामा नेका चुनाव प्रसारप्रसारमा परिचालन भएका यातायात साधनमाथि तोडफोड एवम् आगजनी गरी पु¥याएको क्षतिको भत्र्सना गर्दै यस्तो कार्यले पार्टी विचलित नहुने बताउनुभयो ।
सञ्चारकर्मीको जिज्ञासामा संयोजक लेखकले स्थानीय आवश्यकताअनुसार नै केही जिल्लामा अन्य पार्टी्सित चुनावी तालमेल भएको भन्दै तालमेल गरेका स्थान र जिल्लामा अब कुनै समस्या र द्विविधा नरहेको स्पष्टसमेत पार्नुभयो ।
