काठमाडौं, बैशाख २१ ।
महाअभियोग प्रस्ताव प्रति असन्तुष्टी जनाउदै पदबाट राजिनामा दिनुभएका उपप्रधान तथा गृहमन्त्री विमलेन्द्र निधि फेरी काममा फर्कनुभएको छ ।
प्रधानमन्त्री पुष्पकमल दाहाल र काग्रेस सभापति शेरबहादुर देउवासँग आज बिहान छलफल गरेपछि निधी राजिनामा फिर्ता लिन सहमत हुनुभएको थियो ।
सो लगत्तै निधीले गृहमन्त्रालय पुगि आफ्नो जिम्मेवारी सम्हाल्नुभएको हो ।
प्रधानन्यायधिसलाई महाअभियोग लगाउने काग्रेस र माओवादी केन्द्रको निर्णयपछि असहमती जनाउदै गत आईतवार उहाँले राजिनामा दिनुभएको थियो । महाअभियोग प्रस्ताव दर्ता लगत्तै राजिनामा दिएपनि प्रधानमन्त्रीले स्वीकृत गर्नुभएको थिएन ।
आज बिहान देउवा र निधीसँगको छलफल लगत्तै प्रधानमन्त्री दाहालले अध्यक्ष उहाँको राजिनामा अस्वीकृत गर्नुभएको हो ।
यसैबीच उपप्रधान एवम् गृहमन्त्री निधिले मधेस मुद्दाको सम्बोधन, संविधान संशोधन, स्थानीय निर्वाचन र देश र जनताको आवश्यकताको जिम्मेवारीलाई ध्यानमा राख्दै मन्त्री पदबाट दिएको राजीनामा फिर्ता लिएको बताउनुभएको छ ।
जनकपुर विमानस्थलमा आज पत्रकारहरूसँग सङ्क्षिप्त कुराकानी गर्दै उहाँले पार्टी सभापति र प्रधानमन्त्रीको आग्रह र राष्ट्रिय समस्याको संवेदनशीलतालाई दृष्टिगत गर्दै आफूले राजीनामा फिर्ता लिएको स्पष्ट गर्नुभयो ।
आफूले मन्त्री पदबाट राजीनामा दिएपछि मधेसी मोर्चाका नेताले राजीनामाका बारेमा पुनर्विचारको सुझाव दिएको उहाँको भनाई छ ।
एक प्रश्नको जवाफमा उपप्रधानमन्त्रीले महाअभियोग प्रस्ताव फिर्ताका बारेमा छलफल हुन सक्ने धारणा पनि राख्नुभयो । उहाँले संविधान संशोधन प्रस्तावको टुङ्गो छिट्टै लाग्ने विश्वाससमेत व्यक्त गर्नुभयो ।
